ލުބުނާނުގައި ޔަހޫދީން ޕޭޖަރުތަކެއް ގޮއްވާލައި، 9 މީހުން މަރުވެ 2000 އަށް ވުރެ މީހުން ޒަހަމްވެއްޖެއެވެ.

ލުބުނާނުގެ ހެލްތު މިނިސްޓަރު ފިރާސް އަބިއާދް ވިދާޅުވީ މި ހަމަލާތަކުގައި 8 އަހަރުގެ ކުޑަ ކުއްޖެއްވެސް މަރުވެފައިވާ ކަމަށާއި، 200 އަށް ވުރެ ގިނަ މީހުންގެ ހާލު ސީރިއަސް ކަމަށެވެ. މިނިސްޓަރު ފާހަގަކުރެއްވި ގޮތުގައި، ގިނަ ހަމަލާތައް އަމާޒުވެފައި ވަނީ މީހުންގެ މޫނާއި އަތުގެ އިތުރުން ބަނޑަށެވެ.

ލުބުނާންގެ ހިޒްބުﷲ ޖަމާއަތުން ވަނީ މިއީ ހައްދުފަހަނައަޅާފައިވާ ޔަހޫދީން ދިން ހަމަލާއެއް ކަމަށް ބުނެފައެވެ. ހިޒްބުﷲ އިން ނެރުނު ބަޔާނެއްގައި ބުނީ، 2 މުޖާހިދަކާއި އިތުރު އަންހެން ކުއްޖަކުވެސް މި ގޮވުންތަކުގައި މަރުވެފައިވާ ކަމަށާއި، މިއީ އެ ޖަމާޢަތުގެ ސަލާމަތީ ފިޔަވަޅުތައް ފޫއަޅައިލި އެންމެ ބޮޑު ހާދިސާ ކަމަށެވެ.

Advertisement

މި ޕޭޖަރުތައް ހިޒްބުﷲ އަށް ހަވާލު ކުރުމުގެ ކުރިން އެހެން ބަޔަކު އޭގައި ގޮވާތަކެތި ހަރުކޮށްފައިވާކަމަށް ކަމާ ބެހޭ ފަރާތްތަކުން އަންނަނީ ބުނަމުންނެވެ.

މި ގޮުވުމުގައި ލުބުނާނުގައި ހުންނަ އީރާނުގެ ސަފީރު މުޖުތަބާ އަމާނީ ވެސް ޒަހަމްވެފައިވާއިރު، މީގެ މަސްތަކެއް ކުރިން ހިޒްބުﷲ ގެ ލީޑަރު ހަސަން ނަސްރުﷲ ވަނީ އިސްރާއީލުން ޖާސޫސު ކުރުމުގެ ފުރުސަތު އޮންނާނެތީ މުޖާހިދުން ސްމާޓްފޯނު ބޭނުން ނުކުރުމަށް އަންގަވާފައެވެ.

އޭގެ ފަހުން ހިޒްބުﷲ މުއާމަލާތްކުރުމަށް އާއްމުގޮތެއްގައި ބޭނުން ކުރަނީ ޕޭޖަރު ފަދަ ތަކެއްޗެވެ.