‎ސަރުކާރުންވިޔަސް ބީއެމްއެލްއަށް އޮތް އިތުބާރު ގެެއްލޭފަދަ އެއްވެސް ކަމެއް ކޮށްގެން ނުވާނެ ކުރީގެ ރައީސް އިބްރާޙީމް ޞާލިޙް ވިދާޅުވެއްޖެއެވެ. 

ރައީސް ޞާލިޙް މިއަދު އެކްސްގައި ކުރެއްވި ޕޯސްޓެއްގައި ބޭންކް އޮފް މޯލްޑިވްސްއަކީ ވަރަށް ގިނަ އާންމުންނާ ވިޔަފާރިވެރިންގެ ދިރިއުޅުމާ ގުޅިފައިވާ ތަނެއް ކަމަށެވެ.

އަދި އެތަނަކީ އަބަދުވެސް އެންމެންގެ ފުރިހަމަ އިތުބާރު އޮންނަންޖެހޭ ތަނެއް ކަންވެސް ފާހަގަކުރެއްވިއެވެ.

ރައީސް ޞާލިޙް މިހެން ވިދާޅުވެފައިވާއިރު، ބީއެމްއެލްގެ ރުފިޔާ އެކައުންޓުތަކަށް ދޫކޮށްފައިވާ ޑެބިޓް ކާޑްތަކާއި ކްރެޑިޓް ކާޑުތަކުން ރާއްޖެއިން ބޭރުގެ މުއާމަލާތް ނުކުރެވޭ ގޮތަށް އެ ބޭންކުން އޮގަސްޓް 25 ވަނަ ދުވަހު އިއުލާން ކުރުމާއެކު، މުޅި ގައުމު ހަލަބޮލި ވެގެން ދިޔައެވެ. އެއާއެކު، ކުޑަވަގުތުކޮޅެއްގެ ތެރޭގައި ސަރުކާރުގެ މަރުކަޒީ ބޭންކު އެމްއެމްއޭގެ އިރުޝާދަށް ބީއެމްއެލުން ވަނީ އެ ނިންމުން ބާތިލު ކޮށްފައެވެ.

އެފަހުން، 26 އޮގަސްޓް ވަނަ ދުވަހުގެ ރޭ ފުލުހުން ވަނީ ބޭންކުގެ އެ ނިންމުމާއެކު ސަރުކާރު ވައްޓާލަން އިދިކޮޅު ފަރާތްތަކުން ގޮވާލި މައްސަލައެއް ފެންމަތިވި ކަމަށް ބުނެ އެ މައްސަލަ ތަހުގީގު ކުރަން ފަށައިފައެވެ.

އެމައްސަލާގައި ރައީސުލްޖުމްހޫރިއްޔާ ޑރ. މުޢިއްޒުވެސް ވިދާޅުވެފައިވަނީ ބޭންކް އޮފް މޯލްޑިވްސް މެދުވެރިކޮށް ގެންނަން އުޅުނީ މާލީ ބަޣާވާތެއް ކަމަށެވެ. އަދި އެކަން ކޮށްފައިވަނީ ބަޔަކު މީހުން އަޑީގައި ތިބެގެންކަމަށްވެސް ރައީސް ވަނީ ތުހުމަތު ކުރަށްވާފައެވެ.

އޭގެ އިތުރުން ސަރުކާރުގެ ބައެއް ވަޒީރުންވެސް ވަނީ އެކަން ކުރީ އެމްޑީޕީ އަޑީގައި އޮވެގެން ކަމަށް ތުހުމަތު ކޮށްފައެވެ.