ދިވެހި ޒުވާނުން ކުރިއަރައި ދިއުމަށް އެއްވެސް ހުރަހެއް ނެތްކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު، މުހައްމަދު ސަޢީދު ވިދާޅުވެއްޖެއެވެ.

ކްރިއޭޓިވް އިކޮނޮމީ ފަންޑާއި، ފަސް އަހަރުގެ ސްޓްރެޓެޖީ ތަޢާރަފް ކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ސައީދު ވިދާޅުވީ، ދިވެހި ޒުވާނުންނަށް ލިބޭ ފުރުސަތުތަކުގެ އަދަދު ކުޑަވެދާނެކަމަށާއި، އެހެންނަމަވެސް، އޭގައި ލިމިޓެއް އޮތްކަމަށް ގަބޫލުފުޅު ނުކުރައްވާ ކަމަށެވެ.

ވަޒީރު ސަޢީދު ވިދާޅުވީ، ރާއްޖެއިން ފަންނުވެރި އިޤްތިޞާދެއް ތަރައްޤީ ކުރުމަށް ސަރުކާރުން ބޮޑު އިސްކަމެއް ދެއްވާ ކަމަށާއި، އެގޮތުން ދާދި ފަހުން އެމެރިކާއާއެކު ބޭއްވި ޓްރޭޑް އެންޑް އިންވެސްޓްމެންޓް ފްރޭމްވޯކް އެގްރިމެންޓުގެ މަޝްވަރާތަކުގެ ތެރެއިންވެސް ކްރޮސް ބޯޑަރ ޓްރާންސެކްޝަން ނުވަތަ ދެ ޤައުމު ދެމެދު ކުރެވޭ މުޢާމަލާތްތަކަށް ފުރުސަތު ދިނުމާއި ގުޅޭ މަޝްވަރާތައް ކުރެވިފައިވާ ކަމަށެވެ.

ޔޫޓިއުބާއި ގޫގުލް އަދި ޕޭޕަލް ފަދަ ޕްލެޓްފޯމްތަކާއި ވާހަކަ ދައްކައިގެން މި ޚިދުމަތްތައް މެދުވެރިކޮށް ފައިސާ ލިބޭނެ ގޮތް ހެދުމަށް މަސައްކަތް ކުރަމުންދާކަން ފާހަގަކުރައްވަމުން ވަޒީރު ވިދާޅުވީ، މިއީ ގިނަ ޒުވާނުން އިންތިޒާރު ކުރަމުން އަންނަ ކަމެއް ކަމަށެވެ.

ވަޒީރު އިތުރަށް ވިދާޅުވީ، އީކޮމާސް ޕްލެޓްފޯމްތަކަށް ބޭނުންވާ ސައިޒެއް ރާއްޖޭގެ މާކެޓުގައި ނެތް ނަމަވެސް މަސައްކަތް ފެށުމުން އެ ކަމަށް މަގުފަހިވާތަން ފެންނާނެކަމަށެވެ.