ސައުދީ ޕްރޮފެޝަނަލް ލީގުގެ އަލް ނަސްރުން އެޓީމުގެ ކޯޗު ޕޯޗުގަލްގެ ލުއިސް ކާސްޓްރޯ މަގާމުން ވަކިކޮށް އެމަގާމަށް އިޓަލީގެ ތަޖުރިބާކާރު ކޯޗު ސްޓެފާނޯ ޕިއޯލީ ހަމަޖައްސައިފިއެވެ.

އުމުރުން 63 އަހަރުގެ ލުއިސް ކާސްޓްރޯ މަގާމުން ވަކިކުރީ މިސީޒަނުގައި އެޓީމުގެ ނަތީޖާތައް ދައްވުމުގެ ސަބަބުންނެވެ. އަދި ކާސްޓްރޯގެ އިރުޝާދުގެ ދަށުން ފާއިތުވެދިޔަ 14 މަސް ދުވަހުގެ ތެރޭގައި އަލް ނަސްރުން 63 މެޗު ކުޅުނު އިރު، އޭގެތެރެއިން 44 މެޗުން އެޓީމު މޮޅުވިއިރު، ބަލިވެފައިވަނީ ހަތް މެޗުންނެވެ. އަދި އަނެއް 12 މެޗު ނިމުނީ އެއްވަރުވެގެންނެވެ.

އަލް ނަސްރުގެ ކޯޗުކަމުގެ މަގާމައި މިއަދު ހަވާލުވި އުމުރުން 58 އަހަރުގެ ސްޓެފާނޯ ޕިއޯލީ 2019 ވަނަ އަހަރުން ފެށިގެން މިއަދާއި ހަމައަށް މަސައްކަތްކޮށްފައިވަނީ އިޓަލީގެ އޭސީ މިލާނާ އެކުގައެވެ. އަދި ޕިއޯލީގެ އިރުޝާދުގެ ދަށުން 2022 ވަނަ އަހަރުގެ ލީގު ޗެންޕިއަންކަން އެޓީމުން ހޯދިއިރު، މިއަހަރުގެ ޖޫން މަހު ސައުދީ ލީގުގެ އަލް އިއްތިހާދުން ވެސް ވަނީ ޕިއޯލީގެ ހޯދުމަށް މަސައްކަތްކޮށްފައެވެ.

Advertisement