މަތީ ތައުލީމް ހާސިލްކުރަމުންދާ ދަރިވަރުންނަށް ލޯނުގެ ގޮތުގައި މިއަހަރުގެ މިހާތަނަށް 473 މިލިއަނަށްވުރެ ގިނަ ރުފިޔާ ދޫކޮށްފައިވާކަމަށް ހަޔަރ އެޑިއުކެޝަން މިނިސްޓަރު ޑރ.މަރްޔަމް މާރިޔާ ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓްރީގެ މަސައްކަތްތަކާ އަދި ހާސިލްކުރެވުނު ކަންކަމާ ބެހޭގޮތުން ވާހަކަދައްކަވަމުން މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ. މާރިޔާ ވިދާޅުވީ، މިއަހަރުގެ މިހާތަނަށް މަތީ ތައުލީމް ހާސިލްކުރަމުންދާ ދަރިވަރުންނަށް ލޯނުގެ ގޮތުގައި 473 މިލިއަނަށްވުރެ ގިނަ ރުފިޔާ ދޫކޮށްފައިވާކަމަށެވެ.
މިނިސްތަރު ވިދާޅުވީ މިދިޔަ ސަރުކާރުގައި ދަރިވަރުންނަށް ހަމަޖައްސައި ނުދެވުނު ލޯނު ފައިސާވެސް ހަމަޖައްސައިދެމުން އަންނަ ކަމަށެވެ. މިގޮތުން ފައިސާ ދޫކުރުމުގައި ލަސްވެގެން ދަރިވަރެއްގެ ކިޔެވުމަށް ބުރޫއަރާގޮތް ދިމާވެއްޖެނަމަ މިނިސްޓްރީން އެކަމުގައި އެ ދަރިވަރަކު ކިޔަވާ ތަނަކާ ގުޅައިގެން ކަންކަން ހަމަޖައްސަމުންދާކަމަށް މިނިސްޓަރު ވިދާޅުވިއެވެ. މި މޭރުމުން ވާހަކަދައްކަވަމުން މިނިސްޓަރު މާރިޔާ ވަނީ ބައެއް ދަރިވަރުން ލޯނަށް އެދޭއިރު، ހަމަޖެހިފައިވާ އުސޫލުން ހުށަހަޅަންޖެހޭ ލިޔެކިއުންތައް ހަމަޔަށް ފޮނުވަމުން ނުދާކަންވެސް ފާހަގަކުރައްވާފައެވެ.
ދަރިވަރުން ލޯނަށް އެދި ހުށަހެޅުމުގައި ލުއިފަސޭހަ އިންތިޒާމެއް ހަމަޖެއްސުމަށް މަސައްކަތްކުރަމުންދާ ކަމަށްވެސް މިނިސްޓަރު ވިދާޅުވިއެވެ. މިގޮތުން ލޯނަށް އެދި ހުށަހެޅުމުގެ ކަންކަން އޮންލައިން ނިޒާމެއްގެ ދަށުން ކުރުމަށް ނިންމައި އެކަން ހަމަޖެއްސުމަށް މަސައްކަތްކުރަމުންދާކަމަށް މިނިސްޓަރު ވަނީ މިއަދު ވިދާޅުވެފައެވެ.
މިއަހަރުގެ މިހާތަނަށް ފުރަތަމަ ޑިގްރީގެ ކަންކަމުގައި 11،000 ހާހަށްވުރެ ގިނަ ދަރިވަރުންނަށް 115 މިލިއަން ރުފިޔާއަށްވުރެ ބޮޑު އަދަދެއް ވަނީ ދޫކުރެވިފައި
މިނިސްޓަރު މާރިޔާ ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވަނީ ދަރިވަރުންގެ ލޯނުގެ ކަންކަމުގައި މިދިޔަ ދުވަސްތަކުގައި މިނިސްޓްރީއަށް ގުޅި ފަރާތްތަކަށް މުއާމަލާތްކުރުމުގައި ދަތިތަކެއް ކުރިމަތިވިކަން ފާހަގަކުރައްވާފައެވެ. މިނިސްޓަރު ވިދާޅުވީ އެހެން އެ ދިމާވީ ދަރިވަރުންގެ އެކި ކަންކަމުގައި މިނިސްޓްރީއަށް ގުޅާ ފަރާތްތަކުގެ އަދަދު އިތުރުވުމުންކަމަށް ބެލެވޭ ކަަމަށާއި، މިގޮތުން އެއް ދަރިވަރެއްގެ ކަންތަކުގައި އެތައް ބަޔަކު ގުޅަމުންދިޔަކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ދަރިވަރުންނަށް ލޯނު ފައިސާ ދޫކުރުމުގައި ގެންގުޅޭ އުސޫލްތަކަކާއި ހަމަތަކެއް ހުންނަކަމަށާއި، ބައެއް ފަހަރު ކަންކަން ލަސްވަނީ އެ ހުރިހާ ކަންކަމަށް ބަލަންޖެހޭތީކަން މިނިސްޓަރު ވަނީ ފާހަގަކުރައްވާފައެވެ.
ހަޔަރ އެޑިއުކޭޝަން މިނިސްޓަރީން ވަނީ މިއަހަރުގެ މިހާތަނަށް ސްކޮލަރޝިޕްތަކަށް 103 މިލިއަނަށްވުރެ ގިނަ ރުފިޔާ ހޭދަކޮށްފައެވެ.
Advertisement
This content is created and paid for by advertisers and does not involve Voice Journalists
