ސަރުކާރުން އިހަވަންދިއްޕޮޅުގައި ބަންކަރިންގެ ހިދުމަތް މިއަދު ރަސްމީކޮށް ފަށައިފިއެވެ.

ބަންކަރިން ހިދުމަތަކީ މި ސަރުކާރުން ހިންގުމަށް ރާވާފައިވާ އިޤްތިސާދީ މަޝްރޫޢުތަކުގެ ތެރެއިން އެންމެ ފާހަގަކޮށްލެވޭ އެއް މަޝްރޫޢުއެވެ. ބަންކަރިންގެ ހިދުމަތް ފަށާފައިވަނީ އެކަމަށްޓަކއި މިއަދު ހއ ހޯރަފުށީގައި ބޭއްވި ރަސްމިއްޔާތެއްގެ ތެރެއިންނެވެ. މި ހިދުމަތް ފައްޓަވައިދެއްވީ އެ ސަރަހައްދަށް ނިސްބަތްވާ ރައްޔިތުންގެ މަޖިލީހުގެ މެމްބަރުންނެވެ. މި ރަސްމިއްޔާތުގައި އިކޮނޮމިކް މިނިސްޓަރު މުހައްމަދު ސައީދާއި، ބަންކަރިން ހިދުމަތުގައި ހަރަކާތްތެރިވާ ސަރުކާރުގެ ކުންފުނިތަކުގެ އިސްވެރިން ވަނީ ބައިވެރިވެފައެވެ.

ބަންކަރިން ހިދުމަތަކީ ރާއްޖޭގެ އިޤްތިސާދު ސިންދަފާތުކުރުމުގެ ތެރެއިން ކުރިއަށްދާނެ ވަރަށް މުހިއްމު މަޝްރޫޢުއެއްކަމަށް ސަރުކާރުން މީގެކުރިން ސަރުކާރުން ވަނީ ބުނެފައެވެ.

ބަންކަރިން ހިދުމަތް ފެށުމުގެ ތެރެއިން..

ބަންކަރިން ހިދުމަތް ފެށުމަށްޓަކައި އިހަވަންދިއްޕޮޅަށް ވަނީ އެ ހިދުމަތުގައި ބޭނުންކުރުމަށް 2 ބޯޓާއި ޓަޖު ބޯޓު އަދި ޕައިލެޓު ބޯޓު ގެންގޮސްފައެވެ. ބަންކަރިން ހިދުމަތުގައި މިހާރު 4000 ޓަނުގެ ދެ ތެޔޮބޯޓް ބޭނުންކުރާއިރު، ކުރިއަށް އޮތްތަނުގައި އިތުރު ބޯޓުތައް ގެންނައުމަށް ވަނީ ހަމަޖެހިފައެވެ.

ބަންކަރިން ހިދުމަތުގެ ކުރިމަގާ ބެހޭގޮތުން ވާހަކަދައްކަވަމުން އިކޮނޮމިކް މިނިސްޓަރު މުހައްމަދު ސައީދު ވިދާޅުވެފައިވަނީ، ބަންކަރިންގެ ހިދުމަތް ފެށުމުން، އަންނަ އަހަރުގެ ޖުލައި މަސް ފެށެންވާއިރަށް ރާއްޖޭގެ ޖީޑީޕީގެ ގޮތުގައި މިހާރު އޮތް 6.5 ބިލިއަން ޑޮލަރުގެ ތެރެއަށް 400 މިލިއަން ޑޮލަރު އިތުރުވާނެ ކަމަށެވެ.

ބަންކަރިން ހިދުމަތާ ބެހޭގޮތުން މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ މުޙައްމަދު ވަޖީހު ވިދާޅުވެފައިވަނީ، މި ހިދުމަތާއެކު އިހަވަންދިއްޕޮޅުގައި މެރިޓައިމްގެ 14 ހިދުމަތެއް ފޯރުކޮށްދޭނޭ ކަމަށެވެ. 

ބަންކަރިންގެ ޚިދުމަތް މި މަހު އޮފް-ޝޯކޮށް ފެށިނަމަވެސް ދެވަނަ ފިޔަވަހީގެ ދަށުން ބޯޓުތައް ހޯރަފުއްޓަށް ބަނދަރުކޮށްގެން ޚިދުމަތްދިނުމަށް އިހަވަންދިއްޕޮޅަށް ބޮޑު ބަދަލެއް ގެންނައުމަށް ވަނީ ނިންމާފައެވެ. އޭގެ ތެރޭގައި ދެވަނަ ފިޔަވަހީގައި ހއ. ހޯރަފުށި ފަޅު ހިއްކައިގެން، އެތަނުގައި ތެޔޮ ޓާމިނަލަކާއި ބައިނަލްއަގުވާމީ ފެންވަރުގެ ކޮންޓެއިނާ ޓާމިނަލެއް ތަރައްގީކުރުން ހިމެނެއެވެ.

ރާއްޖެއާ ކައިރީ ބައެއް ޤައުމުތަކުން ބަންކަރިން ހިދުމަތްތައް ދެމުން އައިނަމަވެސް ރާއްޖެއިން މިކަމުގައި ކުރިހޯދާނީ ވާދަވެރި މާކެޓެއްގެ ތެރެއިންކަމަށްވެސް އެމްޕީއެލްގެ ސީއީއޯ މުހައްމަދު ވަޖީދު ވަނީ ވިދާޅުވެފައެވެ.