ސަލާހުއްދީން ސްކޫލް ދޮށަށް މިއަދު ހަވީރު ކުދިން ބަލައިގޮސް ތިއްބައި ހިޔާ ދެވަނަ ޓަވަރު އެޕާޓްމަންޓަކުން އާފަލު އުކައިފިއެވެ.
އެވަގުތު އެތަނުގައި ހުރި މީހަކު ވޮއިސްއަށް މައުލޫމާތު ހިއްސާކުރަމުން ބުނީ، އާފަލު އުކީ ހިޔާ ދެވަނަ ޓަވަރުގެ މަތީ ކޮންމެވެސް ފަންގިފިލައަކުން ކަމަށެވެ. ނަމަވެސް އާފަލު އުކި ފަންގިފިލައެއް ސާފެއް ނުވެއެވެ.
މިހާދިސާގައި އެއްވެސް މީހަކަށް ގެއްލުމެއް ނުވިނަމަވެސް ބައެއް މީހުންނަށް، އެވަގުތުގެ ގޮތުން ވަރަށްބޮޑު ނުތަނަވަސްކަމެއް ކުރިމަތިވިކަމަށް އެމީހުންގެ މޫނުމަތިން ދޭހަވިކަމަށް އޭނާ ބުންޏެވެ.
"ބޮޑަށް ބެލެވެނީ އެއީ އެއްލި އެއްޗެއް ކަމަށް. ގިނަ ބެލެނިވެރިންވެސް ބުނީ އެއީ ސީދާ އެއްލިއެއްޗެކޭ. އެގަޑިއަކީ ބެލެނިވެރިން ކުދިން ސްކޫލަށް ކުދިން ބަލައި ގޭޓް ތެރެއިން ވަދެގެންދިޔަ ވަގުތު. ނަސީބެއް ކުދިން ނެރުނު ގަޑިއާ ދިމާނުވިކަން އެހެންނޫނީ ކުއްޖެއްގެ ގައިގަ ޖެހުމުގެ ފުރުސަތު ވަރަށްބޮޑުވީސް" އެމީހާ ބުންޏެވެ.
މިއަދު ޓަވަރު ދޭކުން އެއްލި އާފަލެއް... ފޮޓޯ/ ވޮއިސްގެ ކިޔުންތެރިއެއް
ހިޔާ ޓަވަރުން އެއްޗެހި ވެއްޓުމާއި އުކުމަކީ އާއްމު ކަމެކެވެ. ހިޔާ ޓަވަރުމަތިން އެއްޗެހި ވެއްޓުމުގެ ހާދިސާގައި ބޮޑެތި ގެއްލުންތައް ލިބިފައިވާއިރު، މިފަދަ ބައެއް ހާދިސާތަކުގައި ވަރަށް ނުރައްކާތެރި ހާލަތަށް ގޮސްފައިވެސް އެބަހުއްޓެވެ.
Advertisement
This content is created and paid for by advertisers and does not involve Voice Journalists
