ކްރިކެޓް ބޯޑް އޮފް މޯލްޑިވްސް (ސީބީއެމް)ގެ ރައީސް ކަމުގެ މަގާމަށް، މިހާރުވެސް އެމަގާމުގައި ހުންނެވި މުހައްމަދު ފައިސަލް، މިއަދު ދެވަނަ ދައުރަކަށް އިންތިހާބުވެވަޑައިގެންފި އެވެ. 

2020 ވަނަ އަހަރުގެ ސެޕްޓެމްބަރު މަހު، ކްރިކެޓް ބޯޑުގެ ރައީސްކަމަށް ފުރަތަމަ ފަހަރަށް އިންތިހާބުވި ފައިސަލް، މިއަދު ޝީ ބިލްޑިންގައި ބޭއްވި ސީބީއެމްގެ އިންތިހާބު ކާމިޔާބުކުރެއްވީ ކްރިކެޓްގެ އިސް ޚިދުމަތްތެރިއެއް ކަމަށްވާ ފަރުހަތު ޖަލީލްއާއި ވާދަކުރައްވައި ތިން ވޯޓުގެ ތަފާތަކުންނެވެ.

މި އިންތިހާބުގައި 17 ފަރާތަކުން ވޯޓު ލާފައިވާއިރު އޭގެ ތެރޭގައި، 16 ކްލަބެއްގެ އިތުރުން، ސްކޫލް ތަމްސީލްކުރާ ފަރާތެއްގެ ގޮތުގައި، ދަރުމަވަންތަ ސްކޫލް ހިމެނެއެވެ. އެގޮތުން މި އިންތިހާބުގައި ފައިސަލްއަށް 10 ވޯޓު ލިބިފައިވާއިރު ފަރުހަތަށް ލިބިފައިވަނީ، ހަތް ވޯޓެވެ.

މީގެ އިތުރުން ފައިސަލް ވަނީ މީގެ ކުރިން ސީބީއެމްގެ ޖެނެރަލް ސެކްރެޓަރީގެ މަގާމާއި ނައިބް ރައީސްގެ މަގާމު ވެސް އަދާކުރަށްވާފައެވެ. އެ ގޮތުން، ކްރިކެޓް ބޯޑުގެ ޖެނެރަލް ސެކްރެޓަރީކަން 2011 ވަނަ އަހަރު ކުރެއްވިއިރު، ނައިބް ރައީސަކަށް ހުންނެވީ 2012 އިން 2016 އަށެވެ.

މީގެ އިތުރުން މިހާރުވެސް، އިންޓަނޭޝަނަލް ކްރިކެޓް ކައުންސިލް (އައިސީސީ) އިން އޭޝިއާ ސަރަހައްދުގެ ނޮން-އެލިޖިބަލް (ނޮން ވޯޓިން) ގައުމުުތައް ތަމްސީލްކުރާނެ މެމްބަރަކަށް ހުންނެވި ފައިސަލް ވަނީ، މިދިޔަ މެއި މަހު އެ މަގާމުގައި ވެސް އިތުރު ދައުރެއް ކާމިޔާބު ކުރައްވައިފަ އެވެ.

މިއަދުގެ އިންތިހާބުގައި ކްރިކެޓްގެ ނައިބު ރައީސް ކަމުގެ މަގާމަށް ހޮވުނީ، އަހުމަދު އިޝްއާގު އެވެ. އޭނާ އަށް 10 ވޯޓު ލިބުނެވެ. ދެން، އެ މަގާމަށް ވާދަކުރި، އަހުމަދު އާމިރަށް ލިބުނީ ހަތް ވޯޓެވެ.
މީގެ އިތުރުން ފުލް މެމްބަރުންގެ ގޮތުގައި އިންތިހާބުވީ، 17 ވޯޓު ކާމިޔާބުކުރި، އިސްމާއިލް ނަޝްވާން ނާސިރުގެ އިތުރުން، 10 ވޯޓު ހޯދި، އަބްދުﷲ ސައުދާން އިބްރާހިމް، އަހުމަދު އައްސަދު ވަހީދު އަދި މިދިޔަ ދައުުރުގެ ނައިބު ރައީސް، އަހުމަދު ހުސެއިން (ކުޑަދޮނާ) އެވެ. އަދި އެސޯސިއޭޓް މެމްބަރުންގެ ގޮތުގައި ހޮވުނީ، ނުވަ ވޯޓު ހޯދި އަލީ ތޯލިބު އަދި އިބްރާހިމް މޫސާ އެވެ.
މީގެ އިތުރުން، ފަރުދީ މެމްބަރެއްގެ ގޮތުގައި ކުރިމަތިލި، އަހުމަދު ކަލީމް، ހޮވުމާ މެދު ނެގި ފެންނަ ނުފެންނަ ވޯޓުގައި އޭނާ އަށް ނުވަ ވޯޓު ލިބުނުއިރު، ފަސް ވޯޓު ދެކޮޅަށް އަދި ތިން ވޯޓު ވަނީ ބާތިލްވެފަ އެވެ.