ބޭންކް އޮފް މޯލްޑިވްސްގެ ޑިރެކްޓަރުންގެ ބޯޑަށް ސަރުކާރުގެ ފަރާތުން އައްޔަނުކުރުމަށް ނަން ފޮނުވި ޑިރެކްޓަރުން މިއަދު އައްޔަނުކޮށްފިއެވެ.

ސަރުކާރުގެ ފަރާތުން ބީއެމްއެލް ބޯޑަށް އައްޔަނުކުރުމަށް ފޮނުވި 3 ޑިރެކްޓަރުން އައްޔަނުކޮށްފައިވަނީ މިއަދު އެކަމަށްޓަކައި ބޭއްވި އީޖީއެމްގައެވެ. ބީއެމްއެލްގެ ބޯޑަށް އަލަށް އައްޔަނުކުރި ޑިރެކްޓަރުންނަކީ، މުހައްމަދު އަލީ ހަބީބް، އަލީ އިރުފާނުގެ އިތުރުން މުހައްމަދު ޝާހިދުއެވެ.

ބީއެމްއެލް ބޯޑުގައި ޗެއާމަން ހިމެނޭހެން 13 ބޭފުޅުން ތިއްބަވައެވެ. ބީއެމްއެލް ބޯޑަށް ސަރުކާރުންގެ ފަރާތުން 3 ޑިރެކްޓަރަކު އައްޔަނުކުރިއިރު، އިއްޔެގެ ވަގުތެއްގައި ސަރުކާރުގެ ޑިރެކްޓަރެއްގެ ގޮތުގައި ބޯޑުގައި ހުންނެވި އާއިޝަތު ސަޖްނީ ވަނީ އިސްތިއުފާދެއްވާފައެވެ. މީގެ ކުރިން ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރު ކަމުގެ މަގާމުގައި ހުންނެވި ކަރލް ސްޓުމްކަ އަދި ޑެޕިއުޓީ ސީއީއޯ އާއިޝަތު ނޫރައްދީންވެސް ވަނީ އިސްތިއުފާދެއްވާފައެވެ.

މައުލޫމާތު ލިބިފައިވާ ގޮތުގައި އެ ބޭފުޅުން އިސްތިއުފާ ދެއްވާފައިވަނީ، މިފަހުން ރުފިޔާ ކާޑަށް ޑޮލަރު ދޫކުރުމުގައި ހިނގާދިޔަ ކަންތައްތަކާ ގުޅިގެން އުފެދުނު ހިޔާލުތަފާތުވުމުގެ ތެރެއިންނެވެ. ސަރުކާރުން ބަގާވަތެއްގެ ގޮތުގައި ސިފަކޮށްފައިވާ، އެ މައްސަލައާ ގުޅިގެން ފުލުހުން ވަނީ ޖިނާއީ ތަހުގީގެއްވެސް ފަށާފައެވެ.