ސެންޓަރެއްގައި ރަޖިސްޓްރީނުކޮށް ޓެކްސީ ހިދުމަތް ނުދެވޭ ގޮތަށް ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާއިން ގަވާއިދު އިސްލާހުކޮށްފިއެވެ.

މީގެ ކުރިން ގަވާއިދުގައި އޮންނަ ގޮތުން ޓެކްސީ ސެންޓަރެއްގައި ރަޖިސްޓްރީނުކޮށް ވެސް ޓެކްސީ ހިދުމަތް ދެވޭނެ އެވެ.

2022 ވަނަ އަހަރުން ފެށިގެން އެ ގަވާއިދަށް އަމަލުކުރަމުން އައިސްފައި ވީ ނަމަވެސް، އެ ވުޒާރާއިން މި ގެނައި އިސްލާހާއިއެކު، މީގެ ފަހުން ޓެކްސީގެ ހިދުމަތް ދެވޭނީ ޓެކްސީ ސެންޓަރެއްގައި ރަޖިސްޓްރީވެފައިވާ ކާރުތަކަށް އެކަންޏެވެ.

Advertisement

މި ގަވާއިދު ބަޔާން ކުރާ ގޮތުން، ޓެކްސީ ލައިސަންސް ދޫކުރުމަށް އެދޭ އުޅަނދަކީ ލައިސަންސް ލިބިފައިވާ ޓެކްސީ ސެންޓަރެއްގައި ލިސްޓްކޮށްފައިވާ އުޅަނދެއްކަމުގައި ވާންޖެހޭނެއެވެ. މީގެ އިތުރުން، ލައިސަންސަށް އެދޭއިރު އެ އުޅަނދަކީ ޓެކްސީ ސެންޓަރެއްގައި ލިސްޓްކޮށްފައިވާ އުޅަނދެއްކަން އަންގައިދޭ ލިޔުމެއް ހުށަހަޅަންޖެހޭނެ ކަމަށްވެސް ބަޔާންކޮށްފައިވެއެވެ.

އެ ވުޒާރާއިން ހާމަކުރި ގޮތުގައި މިއީ ޓެކްސީ ޚިދުމަތް އިތުރަށް ރަނގަޅުކޮށް، ފަސިންޖަރުންގެ ރައްކާތެރިކަން ކަށަވަރުކުރުމަށް ގެނެވުނު އިސްލާހެކެވެ.