ފަސް އަހަރުގެ ތެރޭ މަދުވެގެން 500 އިމާމުން ރާއްޖެއިން ބޭރުން ތަމްރީނު ކުރާނެ ކަމަށް އިސްލާމީ ކަންތައްތަކާއި ބެހޭ ވަޒީރު ޑރ.މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.
މިއަހަރު ރާއްޖޭގެ ހުރިހާ އިމާމުންނަށް އމަާޒުކޮށްގެން ކުރިއަށް ގެންދާ އިމާމުންގެ މަހާސިންތާގައި ވާހަކަފުޅު ދައްކަވަމުން ވަޒީރު ޝަހީމް ވިދާޅުވީ، މި ފަސް އަހަރުގެ ތެރޭ މަދުވެގެން 500 އިމާމުން ރާއްޖެއިން ބޭރަށް ފޮނުވައިގެން ތަމްރީނު ކުރާނެ ކަމަށާއި، މަދުވެގެން 1000 ޒުވާން ޚަތީބުން ނެރޭނެ ކަމަށެވެ.
އިމާމްކަމުގެ މަޤާމަކީ ހާދަ މަތީ މަޤާމެކޭ. މާތް ﷲ ކަނޑައަޅުއްވާފައިވާ އެހާ މާތް އަޅުކަމެއްގެ ތެރޭގައި އެންމެ އިސް މީހެއްގެ ގޮތުގައި ހުންނަން ޖެހޭ މީހާއަކީ މަތީ ޝަރަފަކާއި އިއްޒަތެއް އޮތް މީހެއް."
ވަޒީރު ޝަހީމް ވިދާޅުވިއެވެ.
ވަޒީރު ޝަހީމް ވިދާޅުވީ، މަހާސިންތާގައި މަޝްވަރާކޮށް ނިންމާ ކަންތައްތައް ތަންފީޒު ކުރައްވާނެކަމަށާއި، އޭގެ ތެރޭގައި އިމާމުންގެ އައު އޮނިގަނޑު އެކުލަވާލާއިރު، މި މަހާސިންތާގައި މަޝްވަރާކުރާ ކަންތައްތަކާއި ނިންމާ ކަންތައްތައް އައު އޮނިގަނޑުގައި ހިމަނުއްވާނެކަމަށެވެ.
އެއް ދުވަހުގެ މުއްދަތަށް ކުރިއަށްގެންދާ މި މަހާސިންތާގައި ޙާޒިރުވެގެން 208 އިމާމުން އަދި އޮންލައިންކޮށް 300 އިމާމުން ބައިވެރިވާއިރު، މިއީ އިމާމުން ތަމްރީނު ކުރުމާއި ޒުވާން އިމާމުންގެ ޖީލެއް މުޖުތަމަޢުއަށް ނެރުމާއިއެކު، އިމާމުންނާއި އިސްލާމީ ކަންތައްތަކާ ބެހޭ ވުޒާރާއާ ގުޅުން ބަދަހިކުރައްވާ، އިމާމުންގެ ހުށައެޅުންތައް އަޑުއަހައި، މަޝްވަރާކުރުމާއި އިމާމުންގެ ދައުރު ފުޅާ ކުރުމަށް މަސައްކަތްކުރުމަށްޓަކައި ބާއްވާ މަހާސިންތާ އެކެވެ.
Advertisement
This content is created and paid for by advertisers and does not involve Voice Journalists
