ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ދިވެހި ރާއްޖެ ފަހުރުވެރިވާވަރަށް ދިވެހިންގެ އަޑު އުފުއްލަވަމުން ގެންދަވާކަމަށް މިނިސްޓަރ އޮފް ސިޓީސް، ލޯކަލް ގަވަމެންޓް އެންޑް ޕަބްލިކް ވޯކްސް އާދަމް ޝަރީފް އުމަރު ވިދާޅުވެއްޖެއެވެ.
މިނިސްޓަރ އާދަމް ޝަރީފް މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
މިގޮތުން މިނިސްޓަރު ވިދާޅުވީ އދ ގެ ޖެނެރަލް އެސެމްބްލީ (ޔޫއެންޖީއޭ) ގައި ބައިވެރިވެވަޑައިގަތުމަށް ރައީސް ޑރ.މުޢިއްޒު ކުރައްވާ ދަތުރުފުޅުގައި އެ މަނިކުފާނު ގެންދަވަނީ ގައުމު ފަހުރުވެރިވާވަރަށް ރާއްޖެ ތަމްސީލު ކޮށްދެއްވައު، ދިވެހިންގެ އަޑު އުފުއްލަވަމުން ކަމަށެވެ.
ރާއްޖޭގެ މަސްލަހަތާއި ދިވެހިންގެ އިހުސާސްތަކާއި ވިންދާއި އެއްގޮތަށް، ދިވެހި ގައުމު އިސްކުރެއްވުމުގެ ސަބަބުން ރައީސް ޑރ.މުޢިއްޒު އަށް އޮންނަ އިތުބާރާއި ޔަގީންކަން އެތައް ގުނަ އަކަށް އިތުރުވެފައިވާ ކަމަށްވެސް މިނިސްޓަރު އާދަމް ޝަރީފް ވިދާޅުވިއެވެ.
މީގެ އިތުރުންވެސް މިނިސްޓަރު ވިދާޅުވީ، ރައީސް ޑރ.މުޢިއްޒު ގެ ތަގުރީރުތަކުގެ އެންމެ ހާއްސަ އެއް ކަމަކީ ގައުމިއްޔަތު ބިނާ ކުރެއްވުމަށް ދެއްވާ ސަމާލުކަމާއި އަހަންމިއްޔަތުކަން ކަމަށެވެ.
އެކުވެރި ދައުލަތްތަކުގެ އާންމު މަޖިލީހުގެ 79 ވަނަ ސެޝަންގައި ބައިވެރިވެވަޑައިގަތުމަށްޓަކައި ރައީސް ޑރ.މުޢިއްޒު ކުރައްވަމުން ގެންދަވާ ދަތުރުފުޅުގައި އާންމު މަޖިލީހުގެ 79 ވަނަ ސެޝަންގައި ރައީސް ޑރ.މުޢިއްޒު އަންގާރަ ދުވަހު ތަގުރީރު ކުރެއްވުމުގެ އިތުރުން، އެމަނިކުފާނުގެ މިދަތުރުފުޅުގައި ސަމިޓް އޮފް ދަ ފިއުޗަރގައި ބައިވެރިވެވަޑައިގަންނަވައި، މުހިއްމު މަޝްވަރާތަކުގެ ރިޔާސަތު ބެލެހެއްޓެވުމުގެ އިތުރުން ހަވާސާގައި ކުރިއަށްދާ ހަރަކާތްތަކުގައިވެސް އެމަނިކުފާނު ބައިވެރިވެވަޑައިގަންނަވާނެއެވެ. މީގެ އިތުރުން އެކި ދައުލަތްތަކާއި ޤައުމުތަކުގެ އިސް ވެރިންނާ ބައްދަލުކުރައްވައި ބައިލެޓަރަލް އަދި މަލްޓިލެޓަރަލް މަޝްވަރާތައް ކުރިއަށްގެންދަވާނެއެވެ.
Advertisement
This content is created and paid for by advertisers and does not involve Voice Journalists
