މީގެ 12 އަހަރު ކުރިން ކ. ކާށިދޫގައި މަރާލި ޕޮލިސް އާދަމް ހަލީމް މަރާލި މައްސަލައިގައި މެރުމަށް ހުކުމްކޮށްފައިވާ މުހައްމަދު ސަމާހުގެ މައްސަލަ އަލުން ބެލުމަށް ސުޕްރީމް ކޯޓުން ކްރިމިނަލް ކޯޓަށް އަމުރުކޮށްފި އެވެ.

23 ޖުލައި 2012 ވަނަ ދުވަހު ޑިއުޓީއަށް ނުކުމެ ހުއްޓައި އާދަމް ހަލީމަށް ވަޅިއަކުން ހަމަލާދީ މަރާލި މައްސަލައިގައި ކ. ކާށިދޫ، ސުވާސާގޭ މުހައްމަދު ސަމާހުގެ މައްޗަށް ކުށް ސާބިތުވާ ކަމަށް ކަނޑައަޅައި އޭނާގެ މައްޗަށް މަރުގެ ހުކުމް 2013 ވަނަ އަހަރު ކްރިމިނަލް ކޯޓުން އިއްވިއެވެ. އެއާއެކު، 2020 ވަނަ އަހަރު ހައި ކޯޓުން ވަނީ އެހުކުމް ދަމަހައްޓާފައެވެ.

މި މައްސަލަ ސަމާހުގެ ފަރާތުން ސުޕްރީމް ކޯޓުގައި އިސްތިއުނާފު ކުރިއިރު، މިއަދު ބޭއްވި އަޑުއެހުމުގައި މައްސަލަ ބެއްލެވި ފަނޑިޔާރު ހުސްނުއްސުއޫދު ވިދާޅުވީ، ސަމާހު ކުށަށް އެއްބަސްވުމަށްފަހު ފަހުން ސަމާހު ޝަރީއަތުގެ މަޖިލީހުގައި ދީފައިވާ ބަޔާނުގައި ގަސްދުގައި މީހަކު މެރި ކަމަށް އިންކާރު ކުރާ ކަމަށާއި، އޭނާގެ މައްޗަށް ޕްރޮސެކިއުޝަނުން ދައުވާ ކޮށްފައިވާ ކުށް ކަމަށް ގަސްދު މަރުގެ ކުށަށް އެ ބަޔާނުގައި އިންކާރު ކޮށްފައިވާ ކަމަށެވެ.

މީގެ ކުރިން ސަމާހު ކުށަށް އެއްބަސްވުމުން އޭނާއާ ދެކޮޅު އިތުރު ހެއްކެއް ފުލުހުން ހޯދާފައި ނުވާ ކަން ފާހަގަކުރައްވައި ފަނޑިޔާރު ވިދާޅުވީ، މިއީ ޖިނާއީ ތަހުގީގުކުރަންޖެހޭ އަދި ޖިނާއީ ޝަރިއަތްކުރަންޖެހޭ ގޮތެއްވެސް ނޫންކަމަށެވެ.

ހަމައެއާއިއެކު، މި މައްސަލައިގައި އިއުތިރާފު ބަޔާނުގެ މައްޗަށް އެކަނި ތަހުގީގުންނާއި ޝަރިއަތުން ބަރޯސާވުމުގެ ސަބަބުން ސަމާހު މުޅި ބަޔާނަށް އިންކާރުކޮށް، ކުށްކުރި ތަނުގައި އެގަޑީގައި އޭނާ ނުވެސް ނެތް ކަމަށް ބުނެފައިވާކަމަށާއި، އިއުތިރާފު ބަޔާން ކަށަވަރުކޮށްދޭ އަދި ނަފީކޮށްދޭ މިނިވަން ހެއްކެއް ޝަރީއަތުގެ ކުރިމަތީގައި މިއަދު ނެތްކަން ވެސް އަޑުއެހުމުގައި ފާހަގަކުރިއެވެ.

އެ މައްސަލަ ސުޕްރީމް ކޯޓުން ބެއްލެވީ ފަނޑިޔާރު ހުސްނުއްސުއޫދާއި ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު އައިޝާ ޝުޖޫން މުހައްމަދުގެ އިތުރުން ފަނޑިޔާރު މަހާޒް އަލީ ޒާހިރު އަދި ފަނޑިޔާރު ޑރ. މުހައްމަދު އިބްރާހިމެވެ. ބެންޗުގެ ރިޔާސަތުގެ ބެލެހެއްޓެވީ ފަނޑިޔާރު ސުއޫދެވެ.