ހިޖާމާ ޖެހުމުގެ ހުއްދަ ލިބެންދެން އެކަން ހުއްޓާލަން ފަޒީސް ހިޖާމާ ކްލިނިކުގެ ވެރިޔާ ފަޒީލާ އުސްމާނަށް ފުލުހުން އަންގައިފިއެވެ.

ފުލުހުން މިއަފު ބުނީ، ހުޅުމާލޭގައި ހިޖާމާ ޖެހުމުގެ ޚިދުމަތް ދެމުންދާ ކްލިނިކެއްގެ މައްސަލަ ބަލައިދިނުމަށް ހެލްތު މިނިސްޓްރީން އެދުމާ ގުޅިގެން ފުލުހުން އެ މައްސަލައާ ގުޅޭ ކަންކަން ބަލާފައިވާ ކަމަށެވެ.

އަދި މިކަމާ ގުޅިގެން ކްލިނިކުގެ ވެރިފަރާތް ކަމަށްވާ ފަޒީލާއަށް ނަސޭހަތްތެރިވެ، ޤާނޫނުގެ ދަށުން ހޯދަންޖެހޭ ހުއްދަތައް ހޯދައިގެން ހިޖާމާގެ ފަރުވާ ދިނުމަށާއި، މިހާރު ދެމުން ގެންދާ ހިޖާމާ ޖެހުމުގެ ޚިދުމަތް، ހުއްދަ ލިބެންދެން ހުއްޓާލުމަށް ލިޔުމުން އަންގާފައިވާނެ ކަމަށްވެސް ފުލުހުން ބުންޏެވެ.

ފުލުހުންގެ ފަރާތުން މިކަމާ ގުޅޭ އިތުރު މަޢުލޫމާތު ދެމުން ވިދާޅުވީ، މި މައްސަލައާ ގުޅިގެން ފުލުހުން ހިންގާ ތަޙުޤީޤަށް ލިބެންޖެހޭ އެއްބާރުލުން ކްލިނިކުގެ ވެރިފަރާތުން ދެމުން ގެންދާ ކަމަށެވެ. އަދި ތަޙުޤީޤު އަދިވެސް ކުރިއަށްދާ ކަމަށެވެ. 

ހެލްތު މިނިސްޓްރީން މީގެ ކުރިން ވަނީ ނެރުނު ބަޔާނެއްގައި ވަނީ ރަޖިސްޓްރީކޮށް، އޮޕަރޭޓިން ލައިސެންސް ލިބެންދެން އެ ތެރަޕީގެ ހިދުމަތްތައް ހުއްޓާލުމަށް ފަޒީލާއަށް އަންގާފައިވާ ކަމަށެވެ. އެއާ ހިލާފަށް މަސައްކަތްކުރާ ނަމަ ގާނޫނުގެ ދަށުން ފިޔަވަޅު އަޅާނެ ކަމުގެ އިންޒާރު މިނިސްޓްރީން ދިންކަމަށް ބުނެފައެވެ. 

އަދި ފަޒީލާގެ ހިޖާމާ ހިދުމަތް ޕްރޮމޯޓް ކުރަން ސޯޝަލް މީޑިއާގައި ކޮށްފައިވާ އިޝްތިހާރުތަކަކީ މިނިސްޓްރީގެ ހުއްދަ ލިބިގެން ނޫނީ ކުރެވޭނެ ކަމަކަށް ނުވާތީ އެ އިޝްތިހާރުތައް ނެގުމަށް ވެސް އަންގާފައިވާއިރު މީސްމީޑިއާގއއި އޭނާ އާއްމު ކުރާ ބަލި މީހުންގެ މެޑިކަލް ރިޕޯޓުތަކުގެ މައުލޫމާތަކީ އެންމެ ރައްކާތެރި އަދި ސައްހަ މައުލޫމާތުކަން ކަށަވަރު ނުވާތީ އެ ރިޕޯޓުތައް ނެގުމަށް ވެސް މިނިސްޓްރީން ވަނީ އަންގާފައެވެ. 

ހުއްދަ ނެތި ހިޖާމާ ޖަހާތީ އެކަން ނުކުރަން ތަކުރާރުކޮށް ފަޒީލާއަށް މީގެ ކުރިން ވެސް އަންގާފައުވާކަން ފާހަގަކޮށްލަންޖެހެއެވެ.

ހެލްތު މިނިސްޓްރީގެ ހުއްދަ ނެތި މިފަދަ ޚިދުމަތްތައް ދިނުމަކީ ޤާނޫނާ ޚިލާފު ކަމެކެވެ.