ހައިވޭއިން ސޯލާ ޕެނަލްތައް ނަގައިގެން ބަދަލުކުރުމާ ގުޅޭ ގޮތުން ކޮންޓްރެކްޓަރާއި ވޯލްޑް ބޭންކާ އެކު މަޝްވަރާތައް ކުރިއަށްދާ ކަމަށް މިނިސްޓަރު އޮފް ކްލައިމެޓް ޗޭންޖް، އެންވަޔަރަންމަންޓް، އެންޑް އެނާޖީ ތޯރިގު އިބްރާހިމް ވިދާޅުވެއްޖެ އެވެ.

ހައިވޭގައި ސޯލާ ޕެނަލް މަޝްރޫޢު އަކީ، ވޯލްޑް ބޭންކްގެ އެހީގައި މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީން ހިންގާ އެކްސެލެރޭޓިންގް ސަސްޓެއިންބަލް ޕްރައިވެޓް އިންވެސްޓްމަންޓް އިން ރިނިއުވަލް އެނާރޖީ (އެސްޕަޔަރ) ޕްރޮޖެކްޓްގެ ދަށުން ތައިލެންޑުގެ "އެންސިސް ކޯ" ކުންފުނިން ނިންމި މަޝްރޫއު އެކެވެ.

އެހެން ނަމަވެސް، އެ ސޯލަރ ޕެނަލްތައް މިހާރު ހުރިގޮތުން ހައިވޭ ބޭނުންކުރާ މީހުންގެ ސަލާމަތާއި ރައްކާތެރިކަމާމެދު ސުވާލު އުފައްދަމުންދާތީއާއި ބްރިޖު ސަރަހައްދުން ފެންނަ ރީތި މަންޒަރު ގެއްލޭތީ އެ ސޯލާ ޕެނަލްތައް އެ ތަނުން ނަގައި، އެހެން ތަނަކަށް ބަދަލުކުރައްވަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނިންމަވާފައެވެ. 

މިކަމާއި ގުޅިގެން ވަޒީރު ޠާރިގު ވިދާޅުވީ އެ ޕެނަލްތައް ބަދަލު ކުރުމަށް ކޮންޓްރެކްޓަރާ އަދި ވޯލްޑް ބޭންކާއެކު މިހާރު ވާހަކަދައްކަމުންދާކަމަށާއި، އެކަމުގައި ދެން ޢަމަލުކުރެވޭނެ ގޮތްތަކާމެދު މަޝްވަރާކުރަމުންދާކަމަށެވެ.

މީގެ ކުރިން މިނިސްޓްރީން ބުނެފައިވާ ގޮތުން، ހައިވޭގައި ޕެނަލް ހަރުކުރުމުގެ މަޝްރޫއުގެ ޖުމްލަ އަގަކީ 11 މިލިއަން ޑޮލަރެވެ. އަދި އެ ޕެނަލްތައް ބަދަލުކުރުމަށް އިތުރު 11 މިލިއަން ޑޮލަރު ހަރަދުވާނެއެވެ. އެއީ ގާތް ގަނޑަކަށް 170 މިލިޔަން ރުފިޔާއެވެ.