ނޭވާލާ ނިޒާމަށް ޖެހޭ ބައްޔެއް ކަމަށްވާ ރެސްޕިރޭޓަރީ ސިންސީޝިއާ ވައިރަސް (އާރުއެސްވީ) ފެތުރޭތީ ސަމާލުވާން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެދެފިއެވެ.

އެޗްޕީއޭ އިން ބުނީ، ކުޑަކުދިންގެ މެދުގައި އާރުއެސްވީ ފެތުރެމުން އަންނަ މިންވަރު އިތުރުވެފައިވާ ކަމަށާއި، އެޗްޕީއޭއިން މިކަން ވަރަށް ގާތުން މޮނިޓަރ ކުރަމުން އަންނަ ކަމަށެވެ.

އާރުއެސްވީ ފެތުރޭތީ އެޗްޕީއޭ އިން ވަނީ މި ބަލިން ރައްކާތެރިވުމަށްޓަކައި އަޅަން ޖެހޭ ފިޔަވަޅުތައް އެޅުމަށް އިލްތިމާސްކޮށްފައެވެ.

މިގޮތުން، ގިނަގިނައިން އަތްދޮވުމާއި، ކެއްސާ ކިނބިހިއަޅާއިރު އަނގައާއި ނޭފަތް ނިވާކުރުމާއި އެފަދަ ކަންކަމަށް ބޭނުންކުރާ ޓީޝޫފަދަ ތަކެތި ރައްކާތެރިކަމާއެކު ނައްތާލުން އަދި މީހުން ގިނަ ތަންތަނަށް ދިއުން މަދުކުރުން ހިމެނެއެވެ.

މި ބަލީގެ އަލާމާތްތައް ކަމަށްވާ ހުން އައުން، ކެއްސުން، ނޭވާލާން އުނދަގޫ ވުން ނުވަތަ މޭގައި ރިއްސުންފަދަ ކަމެއް ކުރިމަތި ވެއްޖެ ނަމަ ވީހާވެސް އަވަހަށް ސިއްހީ ލަފާ ހޯދުމަށް އެޗްޕީއޭއިން ވަނީ އިލްތިމާސްކޮށްފައެވެ.