އދގެ އާންމު މަޖިލީހުގައި ފާސްކުރި މާކަނޑުގެ ދިރުންތަކާއި ސަރަހައްދުތައް ހިމާޔަތްކުރުމާބެހޭ މުއާހަދާއެއްކަމަށްވާ "ބަޔޯޑައިވަރސިޓީ ބިޔޯންޑް ނޭޝަނަލް ޖުރިސްޑިކްޝަން" (ބީބީއެންޖޭ) އާއި، މިނަމާޓާ ކޮންވެންޝަން އޮން މަރކިއުރީ، އދ އަށް ހުށަހަޅައިފިއެވެ.

ޚާރިޖީ ވުޒާރާއިން ނެރުނު ނޫސް ބަޔާނެއްގައި ބުނީ، އެމެރިކާގެ ނިޔުޔޯކްގައި ހުންނަ އދ. ގެ މައި މަރުކަޒުގައި ބޭއްވުނު ހަފްލާއެއްގައި ދިވެހިރާއްޖޭގެ ފަރާތުން ދެ މުޢާހަދާއެއްގައި ބައިވެރިވުމުގެ ލިޔުން ޚާރިޖީ ވަޒީރު މޫސާ ޒަމީރު ހުށަހަޅުއްވާފައިވާ ކަމަށެވެ.

"މިނަމާޓާ ކޮންވެންޝަން އޮން މަރކިއުރީ" ދިވެހިރާއްޖެއިން ތަސްދީޤުކުރުމަށް ވަޒީރުންގެ މަޖިލީހުން ލަފާދެއްވާފައިވާތީ އެކަމާމެދު ރައްޔިތުންގެ މަޖިލީހުގެ ލަފާފުޅަކަށް ހުށައެޅުއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމެވީ މިދިޔަ އަހަރުގެ ޑިސެންބަރު މަހުގެ 10 ވަނަ ދުވަހުއެވެ.

މި މުޢާހަދާ ތަންފީޒުކުރުމުން މުޢާހަދާގެ ދަށުން ޢަމަލުކުރުން ލާޒިމުކުރާ ކަންކަމުގެ ތެރޭގައި މަރކިއުރީ ހިމެނޭ އާލާތްތައް ދެނެގަނެ އެތަކެތި ފޭސް-އައުޓްކޮށް އޭގެ ބަދަލުގައި ބޭނުންކުރެވޭނެ ޢާލާތްތައް ފާހަގަކޮށް، އެތަކެތި ނައްތާލުމުގައި ކަނޑައެޅިފައިވާ، ތިމާވެށްޓަށާއި އިންސާނުންގެ ޞިއްޙަތަށް ރައްކާތެރި މިންގަނޑުތަކަށް އަމަލުކުރުމަށް ބާރުއެޅިގެން ދިޔުމާއި، މިކަން ތަންފީޒުކުރުމަށް މުޢާހަދާގެ ދަށުން މާލީ އެހީ ލިބިގެންދާނެ ކަމަށް ރައީސް އޮފީހުން ވަނީ މީގެ ކުރިން ހާމަކޮށްފައެވެ.

މި މުޢާހަދާ ތަންފީޒުކުރުން ވެގެންދާނީ ތިމާވެއްޓަށާއި އިންސާނުންގެ ސިއްހަތަށް މަރކިއުރީގެ ސަބަބުން ކުރާ ނޭދެވޭ އަސަރު ކުޑަރުމަށް އެޅޭ މުހިންމު ފިޔަވަޅަކަށެވެ.

ދިރޭރަހަ ނުވަތަ މަރކިއުރީ އެކުލެވޭ އުފެއްދުންތަކުން ބޭރުވާ ނުރައްކާތެރި ވިހަ މާއްދާތަކުން އިންސާނުންގެ ޞިއްޙަތަށާއި ތިމާވެށި ރައްކާތެރިކުރުމުގެ މަޤްޞަދުގައި އދ ގެ ތިމާވެށްޓާބެހޭ ޕްރޮގްރާމް، ޔުނައިޓެޑް ނޭޝަންސް ގެ އެންވަޔަރަންމަންޓް ޕްރޮގްރާމް (ޔުނެޕް) ގެ ފަރާތުން 2013 ވަނަ އަހަރު އެކުލަވާލާފައިވާ ބައިނަލްއަޤްވާމީ މުޢާހަދާގައި 147 ގައުމަކުން ވަނީ މިހާތަނަށް ބައިވެރިވެފައެވެ.

ރާއްޖެއިން މި މުއާހަދާގައި ބައިވެރިވުމާއިއެކު، ރާއްޖެ ވެފައިވަނީ މިނަމާޓާ ކޮންވެންޝަން އޮން މަރކިއުރީގައި ބައިވެރިވި 150 ވަނަ ޤައުމަށެވެ. މިއީ ރާއްޖެއިން 2017 ވަނަ އަހަރުން ފެށިގެން  ތަސްދީޤުކުރުމަށް މަސައްކަތްކުރަމުން އަންނަ މުޢާހަދާއެއްކަން ފާހަގަކޮށްލަން ޖެހެއެވެ.

އ.ދ. ގެ އާންމު މަޖިލީހުގައި ފާސްކުރެވުނު އެއްބަސްވުން ކަމުގައިވާ ބަޔޯޑައިވަރސިޓީ ބިޔޯންޑް ނޭޝަނަލް ޖުރިސްޑިކްޝަން (ބީބީއެންޖޭ) ގައި ރާއްޖެއިން ބައިވެރިވުމަށް ވަޒީރުންގެ މަޖިލީހުން ލަފާދެއްވާފައިވާތީ އެކަމާމެދު ރައްޔިތުންގެ މަޖިލީހުގެ ރުހުން ހޯދުމަށް ހުށަހެޅުއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމެވީ މި އަހަރުގެ ފެބްރުއަރީ މަހުގެ 11 ވަނަ ދުވަހުއެވެ.

ދިވެހިރާއްޖެއިން ބީބީއެންޖޭ އެއްބަސްވުމުގައި 3 ސެޕްޓެމްބަރު 2024 ގައި ސޮއިކުރުމާއިއެކު ރާއްޖެ ވެގެން ގޮސްފައިވަނީ މި އެއްބަސްވުމުގައި ބައިވެރިވި 8 ވަނަ ޤައުމަށެވެ.

ދުނިޔޭގެ 83 ޤައުމަކުން މިހާތަނަށް ވަނީ ސޮއިކޮށްފައިވާ މި މުޢާހަދާ އަކީ މާކަނޑުގެ ދިރުންތަކާއި ސަރަހައްދުތައް ހިމާޔަތްކޮށް ރައްކާތެރިކުރުމުގެ އިތުރުން، ދެމެހެއްޓެނިވި ގޮތުގައި ބޭނުންކުރުމަށް މަގުފަހިކުރުމަށް އެކުލަވާލާފައިވާ މުޢާހަދާއެކެވެ. މިއީ މާކަނޑުގެ މާހައުލީ ނިޒާމުތައް ރައްކާތެރިކޮށް ހިމާޔަތްކުރުމަށް މިހާތަނަށް ބައިނަލްއަޤްވާމީ ގޮތުން ކުރެވުނު އެންމެ މުހިންމު މަސައްކަތް ކަން މީގެ ކުރިން ރައީސް އޮފީހުން ވަނީ ހާމަކޮށްފައެވެ.

މި ދެ މުޢާހަދާގައި ބައިވެރިވުމަށް ރައްޔިތުންގެ މަޖިލީހުން 13 މެއި 2024 ގައި ފާސްކުރިއިރު، ބީބީއެންޖޭ ގައި ސޮއިކުރުމުގެ މުއްދަތު  20 ސެޕްޓެމްބަރު 2025 ގައި ހަމަވާކަމަށް ޚާރިޖީ ވުޒާރާއިން ބުނެއެވެ.

 ކަނޑާއި އޭގެ ވަސީލަތްތައް ރައްކާތެރިކޮށް ދެމެހެއްޓެނިވި ގޮތެއްގައި ބޭނުންކުރުމަށާއި، މަރކިއުރީ ފަދަ ނުރައްކާތެރި މަޢުދަނުތަކުން އިންސާނުންގެ ފުރާނައާއި، ދިރިއުޅުމާއި، ޢާންމު ޞިއްޙަތާއި ތިމާވެށި ރައްކާތެރިކުރުމަށް ދިވެހި ސަރުކާރުން އިސްކަން ދެއްވާކަން އެ ވުޒާރާއިން ފާހަގަކުރިއެވެ.