ޕާކިން ޒޯން ތަރައްޤީކުރަން މާފަންނު ސަހަރާ ހުސްކުރުމުގެ މަސައްކަތް މާލެ ސިޓީ ކައުންސިލުން ފަށައިފިއެވެ.
މާފަންނު ސަހަރާ ހުސްކުރުމުގެ މަސައްކަތް މިހަފްތާގައި ފަށާފައިވާއިރު އެ މަސައްކަތް ކުރަމުންދަނީ ލޭންޑް ސްކޭޕިން ސޮލިއުޝަނާއި ޙަވާލުކޮށްގެންނެވެ.
މިކަމާއި ގުޅޭގޮތުން މާލެ ސިޓީ ކައުންސިލުން ބުނީ، ސަހަރާ ހުސްކުރުމުގެ މަސައްކަތް ގާތްގަނޑަކަށް 60 ދުވަހުގެ ތެރޭގައި ނިންމާލެވޭނެކަމަށާއި، އެތަނުންނަގާ ގަބުރުތަކުގެ ކަށިތައް ނައްތާލުމަށް ހަމަޖެހިފައިވަނީ ކަނޑައެޅިފައިވާ އުޞޫލުގެ ދަށުން އިސްލާމީ ކަންތައްތަކާ ބެހޭ ވުޒާރާގެ ބެލުމުގެ ދަށުންކަމަށެވެ.
މާފަންނު ސަހަރާގައި 36،153 އަކަފޫޓު ހުންނައިރު އެތަން އެއްކޮށް ހުސްކުރުމަށްޓަކައި، މިހާރު އެތަނުގެ އެތެރެ ނުފެންނާނެހެން ޓިނުޖަހާ ބަންދުކޮށްފައިވާކަން ފާހަގަކޮށްލަން ޖެހެއެވެ.
ގަބުރުސްތާނުތައް ހުސްކުރުމާ ގުޅޭގޮތުން އިސްލާމީ ފަތުވާދޭ އެންމެ މަތީ މަޖިލީހުން 2017 ވަނަ އަހަރު ނެރުނު ފަތުވާއެއްގައި، ދުވަސްވެ އިންދިރާސްވެފައިވާ ގަބުރުސްތާނުތައް އިހްތިރާމާ އެކު ކޮނެ، އެ ތަންތަނުން ފެންނަ މިނިކަށިތައް އިހްތިރާމާ އެކު އެހެން ގަބުރުސްތާނެއްގައި ވަޅުލުމަށްފަހު އެ ގަބުރުސްތާންތަކުގެ ބިން، އާންމު މަސްލަހަތު ހިމެނޭ ކޮންމެ ކަމެއްގައި ބޭނުން ކުރެވިދާނެ ކަމަށް ބުނެފައިވެއެވެ.
Advertisement
This content is created and paid for by advertisers and does not involve Voice Journalists
