ދުންފަތުގެ ބާވަތްތަކާއި، ވޭޕް ރާއްޖެއަށް އެތެރެކުރުން މަނާކުރުމަށް ދިވެހި ޑޮކްޓަރުންގެ އެންމެބޮޑު މަދަނީ ޖަމިއްޔާ، މޯލްޑިވްސް މެޑިކަލް އެސޯސިއޭޝަނުން ގޮވާލައިފިއެވެ. 

ދިވެހި ޑޮކްޓަރުންގެ ޖަމިއްޔާއިން ނެރެފައިވާ ބަޔާނެއްގައި ބުނެފައިވަނީ، މުޅި ދުނިޔެއަށާއި ދިވެހި ރާއްޖޭގައިވެސް މިއަދު ކުރިމަތިލާންޖެހިފައިވާ އެންމެ ބޮޑު ގޮންޖެހުމަކީ ގައިން ގަޔަށް ނާރާ ބަލިތައްކަމަށެވެ. ދުންފަތާއި ދުންފަތުގެ ބާވަތްތައް ބޭނުންކުރުމަކީ މިފަދަ ބަލިތަކަށް މަގުފަހިކުރުވުމަށް އިސް ރޯލެއް އަދާކުރާ ކަމެއްކަން ދިރާސާތަކުން ފާހަގަކުރޭކަމަށާއި، މިފަދަ ބަލިތަކުގެ ތެރޭގައި ނޭވާލާ ނިޒާމުގެ ބަލިތަކާއި، ހިތުގެ ބަލިތަކާއި، ހަކުރުބަލި އަދި ސްޓްރޯކް ހިމެނޭކަމަށް އެ ބަޔާނުގައި ބުންޏެވެ.

ރާއްޖޭގައި އުމުރުން 18 އަހަރުވުމުގެ ކުރިން ދުންފަތުގެ އިސްތިއުމާލުކުރާކަން ހެދިފައިވާ ދިރާސާތަކުން ދައްކާކަން ފާހަގަކުރަމުން އެ ޖަމިއްޔާގެ ބަޔާނުގައި ބުނެފައިވަނީ، ދުންފަތަކީ އެތައް ހާސް ކެމިކަލް މާއްދާ އާއި 250 ވިހަ އެކުލެވޭ އެއްޗެއް ކަމަށެވެ. މީގެ ތެރެއިން 70 މާއްދާއިން ކެންސަރަށް މަގުފަހިކުރުވާކަން ދިރާސާތަކުން ދައްކާކަމަށްވެސް މެޑިކަލް އެސޯސިއޭޝަނުގެ ބަޔާނުގައި ވަނީ ބުނެފައެވެ.

ދުންފަތުގެ އިސްތިއުމާލުކުރުމުން އެ އުފެދޭ ދުމުން ނުސީދާ ގޮތެއްގައި ކުޑަކުދިންގެ ނޭވާ ހިއްލުމާ ފުއްޕާމޭގައި ޖަރާސީމު އަށަގަތުމާއި، ލޭގެ ކެންސަރު ޖެހުންފަދަ ސިއްހީ މައްސަލަތައް ދިމާވެއެވެ. އަދި މާބަނޑު މީހުން ބައިގެން ދިއުމާއި، ދުވަސްނުފުރާ ވިހެއުން، އުފަންވާއިރު ދަރިފުޅުގެ ބަރުދަން ލުއިވުންފަދަ ސިއްހީ މައްސަލަތައް ދިމާވެއެވެ.

މީގެ އިތުރުން ވޭޕް  އަދި އިލެކްޓްރޯނިކް ސިނގިރޭޓުން ލިބޭ ގެއްލުން ކުޑަކަމަށް ބެލެވުނު ނަމަވެސް ދިރާސާތަކުން ދައްކާގޮތުގައި އޭގެންވެސް ސިއްހަތަށް ގެއްލުންވާކަން އެނގޭކަމަށްވެސް  މޯލްޑިވްސް މެޑިކަލް އެސޯސިއޭޝަނުގެ ބަޔާނުގައި ވަނީ ފާހަގަކޮށްފައެވެ. ވޭޕްފަދަ އާލާތްތައް ބޭނުންކުރުމުން ގައިންގަޔަށް ނާރާ ބަލިތަކަށް މަގުފަހިކުރުވާކަން ފާހަގަކުރަމުން އެ ބަޔާނުގައި ބުނެފައިވަނީ، މެންތޯލް އަދި ސިނަމަން ފަދަ ފްލޭވާތަކަކީ ފުއްޕާމޭ ހަލާކު ކުރުވާ މައިގަނޑު ފްލޭވާކަން ދިރާސާތަކުން ފާހަގަކުރެވޭކަމަށެވެ.

އެ އާލާތްތަކުގައި މަސްތުވާތަކެތި ގަޑުބަޑުކުރުމުގެ ފުރުސަތު ބޮޑުކަމަށާއި، އެއިން މަސްތުވާތަކެއްޗަށް ދެވިހިފުންވެސް އިތުރުވެގެންދާކަމަށް ބަޔާނުގައި ވަނީ ބުނެފައެވެ. މޯލްޑިވްސް މެޑިކަލް އެސޯސިއޭޝަނުގެ މި ބަޔާނުގައި ވަނީ، ދުންފަތުގެ ބާވަތްތަކާއި، ވޭޕް ރާއްޖޭގައި މަނާކުރުމަށް އެކަށޭނެ ފިޔަވަޅުތަކެއް އަޅުއްވައި ދެއްވުމަށް ކަމާބެހޭ އިދާރާތްތަކަށް އިލްތިމާސްކޮށްފައެވެ.