މޫސުން ގޯސްވާނެ ކަމަށް ލަފާކޮށް، މޫސުމާއި ބެހޭ އިދާރާ (މެޓް އޮފީސް) އިން ރާއްޖޭގެ ބޮޑު ބަޔަކަށް ހުދު ސަމާލު ނެރެފިއެވެ.

މިގޮތުން މެޓް އޮފީހުން ވަނީ މިއަދު ހެނދުނު 7 އިން މެންދުރު 12 އާއި ހަމައަށް ހއ އަތޮޅުން ފެށިގެން ތ އަތޮޅަށް ހުދު ސަމާޅު ނެރެފައެވެ.

މި ވަގުތުގެ ތެރޭގައި، މި އަތޮޅުތަކަށް ބޯކޮށް ވާރޭވެހި ގުގުރުމާއިއެކު، ގަޑިއަކު 19 މޭލާއި 24 މޭލާއި ދެމެދުގެ ބާރުމިނުގައި ވައި ޖެހޭނެ ކަމަށް މެޓް އޮފީހުން ވަނީ ލަފާކޮށްފައެވެ. ހަމައެއާއިއެކު، ވިލާގަނޑުގައި 40 މޭލަށް ވައިގަދަވެ، މި ސަރަހައްދުގެ ކަނޑުތައް ގަދަވާނެ ކަމަށް މެޓް އޮފީހުން ވަނީ ލަފާކޮށްފައެވެ.

އެ އިދާރާއިން މިއަދުގެ ހަވީރު 18:00 އާއި ހަމައަށް މުޅި ރާއްޖޭގެ މޫސުން ލަފާ ކުރާ ގޮތަށް ބަލާލާއިރު، ރާއްޖޭގެ އެކި ހިސާބަށް ވިއްސާރަ ކުރާނެ ކަމަށާއި، ބައެއް ރަށްތަކަށް ބޯކޮށް ވާރޭވެހި ގުގުރުން އެކަށީގެންވާކަމަށް ވަނީ ލަފާކޮށްފައެވެ. 

ދެކުނުގެ އަތޮޅުތަކަށް ހުޅަނގުދެކުނާއި ހުޅަނގުން އަދި އެހެން ހިސާބުތަކަށް ހުޅަނގާއި ހުޅަނގުއުތުރުން، ގަޑިއަކު 13 މޭލާއި 23 މޭލާއި ދެމެދުގެ ބާރުމިނުގައި ވައި ޖެހޭނެ ކަމަށާއި، ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވުން އެކަށީގެންވާ ކަމަށް މެޓް އޮފީހުން ބުނެއެވެ.

އެ އިދާރާއިން އިތުރަށް ބުނީ، ކަނޑުތައް ގަދަވާނެ ކަމަށާއި، ރާޅުތަކުގެ އުސްމިނުގައި 4 ފޫޓާއި 7 ފޫޓާއި ދެމެދު ހުންނާނެ ކަމަށެވެ.

އެހެންކަމުން، ހުރިހާ ފަރާތްތަކުން، ހާއްސަކޮށް ކަނޑުދަތުރު ކުރާ ފަރާތްތަކުން މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސްކޮށްފައެވެ.