ލުބުނާނަށް އަމާޒުކޮށް ޔަހޫދީ ސިފައިން ދެމުންގެންދާ ހަމަލާތައް ވަގުތީ ގޮތުން ހުއްޓާލަން ގައުމުތަކުން ގޮވާލައިފިއެވެ.

މިގޮތުން އެމެރިކާއާއި ފްރާންސްއިން ވަނީ ލުބުނާނާއި އިސްރާއީލާއި ދެމެދުގައި ހަނގުރާމައެއް ފެށިދާނެ ކަމުގެ ބިރު ބޮޑުވެފައިވާތީ، މި މައްސަލަ ޑިޕްލޮމެޓިކް ގޮތުން ހައްލުކުރުމަށް މަގުފަހިކުރުމަށްޓަކައި 21 ދުވަހަށް ހަމަލާތައް ހުއްޓާލުމަށް އެއްބަސްވުމަށް ގޮވާލާފައެވެ.

މި ގޮވާލުމަށް އިތުރު 10 ޤައުމަކާއި ޖަމާޢަތަކުން ތާއީދުކޮށްފައިވާއިރު، އޭގެ ތެރޭގައި ހިމެނެނީ، އޮސްޓްރޭލިއާ، ކެނެޑާ، ޔޫރަޕިއަން ޔޫނިއަން، ފްރާންސް، ޖަރުމަނުވިލާތް، އިޓަލީ، ޖަޕާން، ސަޢޫދީ ޢަރަބިއްޔާ، އެމިރޭޓްސް، އަދި ޤަޠަރެވެ.

މި ގައުމުތަކުން ވަނީ 2006 ވަނަ އަހަރުގެ ދެވަނަ އަހަރު، ޔަހޫދީން ލުބުނާނަށް ދިން ހަމަލާތައް ހުއްޓާލުމަށް ޝަރުޠުތައް ކަނޑައެޅި އދ ގެ ސަލާމަތާއި ބެހޭ މަޖިލިސް  (ޔޫއެންއެސްސީ) ރެޒޮލިއުޝަން 1701 ގެ މައްޗަށް ބިނާކޮށް ހައްލެއް ގެނައުމަށް އެއްބަސް ވުމަށް އެދިފައެވެ.

މީގެ އިތުރުންވެސް، މި ގައުމުތަކުން ވަނީ ޔޫއެންއެސްސީ ރެޒޮލިއުޝަން 2735 ގެ ދަށުން ފާސްކުރެވުނު މެއި 31 ގެ ޣައްޒާ ގަތުލުއާއްމުގައި ރަހީނުން ދޫކޮށްލުމުގެ އެއްބަސްވުން ތަންފީޒުކުރުމަށް ވެސް ގޮވާލާފައެވެ.

މި އެއްބަސްވުމުގެ ބޭނުންތަކުގެ ތެރޭގައި ދެގައުމު ގެ ރައްޔިތުން، ބޯޑަރު ހުރަސްކޮށް އެނބުރި ގައުމަށް ދެވޭނެ މަގު ފަހިކުރުން ވެސް ހިމެނެއެވެ.

މިފަދައިން ގައުމުތަކުން ގޮވާލާފައިވާއިރު، އެމެރިކާ އާއި ފްރާންސް ގުޅިގެން، ލުބުނާނަށް ޔަހޫދީން ދެމުންގެންދާ ހަމަލާތައް ހުއްޓުވުމާއި ގުޅޭ ޕްލޭނެއް ތަންފީޒުކުރުމުގެ މަސައްކަތް ކުރަމުން އަންނަކަން ފާހަގަކޮށްލަން ޖެހެއެވެ.