އދ ގެ ސަލާމަތާއި ބެހޭ މަޖިލީހުގައި ވީޓޯ ކުރުމުގެ ބާރު އުވާލުމަށް ގޮވާލައްވައި، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިއްވެވީ ދުނިޔެއާއި އިސްލާމީ އުންމަތުގެ އިހުސާސް ކަމަށް ސަރުކާރުން ހިންގާ މައި ޕާޓީ ޕީއެންސީން ބުނެފިއެވެ.

ޕީއެންސީން މިފަދައިން ބުނީ، އެޕާޓީން ނެރުނު ނޫސްބަޔާނެއްގައިއެވެ.

ޕީއެންސީން ބުނީ، މުޅި ދުނިޔެއަށް ފެންނާނެހެން  އިސްރާއީލުން ފަލަސްތީނާއި ލުބްނާނުގެ ރައްޔިތުންނާމެދު ހިންގަމުންދާ އަނިޔާވެރި ޓެރަރިޒަމްގެ އަމަލުތައް ހުއްޓުވުމަށް ދުނިޔެ ރޮއެ އާދޭސްކުރާއިރު، އެ އަމަލުތައް ހުއްޓުވުމުގައި އދ ފެއިލް ވެފައިވާ ސަބަބަކީ މަދު ދައުލަތްތަކަށް ލިބިފައިވާ ވީޓޯ ކުރުމުގެ ބާރުގެ ސަބަބުންކަން ރައީސް ޑރ.މުޢިއްޒު ފާހަގަކުރެއްވި ކަމަށެވެ.

Advertisement

މި އިމްތިޔާޒު އުވާލެއްވުމަށް ރައީސް ޑރ.މުޢިއްޒު ގޮވާލެއްވި ގޮވާލެއްވުމަކީ ދުނިޔޭގެ މިއަދުގެ އިހުސާސް އަދި ހާއްސަކޮށް އިސްލާމީ އުންމަތުގެ އިހުސާސާއި ދިވެހިންގެ ހިތްތަކުގެ ހިމަނާރުގައި ޖަހަމުންދާ ވިންދުގެ އަޑުކަން އެ ޕާޓީން ފާހަގަކުރިއެވެ.

ޕީއެންސީން ބުނީ، އިސްރާއީލުން ހިންގަމުންދާ ޖަރީމާތައް ތަފްސީލުކޮށް އެހާމެ ފުރިހަމަކޮށް ސިފަކޮށްދެއްވަމުން، އެ އަޑު ސަލާމަތީ މަޖިލީހުގައި ރައީސް އިއްވަވައިދެއްވިކަމީ ރާއްޖޭއަށް ލިބުނު ފަހުރެއް ކަމަށާއި އަދި ދިވެހި ދައުލަތުގެ އިއްޒަތާއި ޝަރަފު ދުނިޔޭގައި އުފުލިގެން ދިޔަ ކަމެއްކަމަށެވެ.

މީގެ އިތުރުންވެސް އދ ގެ ސަލާމަތީ މަޖިލީހުގައި ރައީސް ޑރ.މުޢިއްޒު ދެއްކެވި ވާހަކަފުޅުތަކަށް އަލި އަޅުވައިލައްވަމުން ޕީއެންސީން ވަނީ އެމަނިކުފާނަށް މަރުޙަބާ ދަންނަވައި، ދުނިޔޭގެ އެންމެ ބާރުގަދަ މަޖިލީހުގައި ރާއްޖޭގެ އަޑު އިއްވެވުމަށް ނިންމެވީތީ އެކަމަށް ޝުކުރު އަދާކޮށްފައެވެ.