އެކްސިޑެންޓްތައް ހިނގާ އަދަދު އިތުރުވުމާއެކު، ހުޅުމާލޭގެ ބޭސްފިހާރަތަކުން ފާރުގަނޑުގައި އަޅާބޭސް ހުޅުމާލެއިން ހުސްވެއްޖެއެވެ.
ވޮއިސްއަށް މައުލޫމާތު ހިއްސާކުރި ބައެއް ފަރާތްތަކުން ބުނީ، އެކްސިޑެންޓް ފަދަ ހާދިސާތަކުގައި ގައިގެ ތަންތަން މަށައިގެން ދިއުމުން އުނގުޅުމަށް ބޭނުންކުރާ އޮއިންޓްމަންޓްތައް ހުޅުމާލޭގެ ބޭސްފިހާރަތަކުން މުޅިން ހުސްވެފައި ހުރިކަން ފާހަގަކޮށްފައެވެ. އެހެންވެ ބޭސް ގަންނަން ބޭނުންނަމަ މިހާރު ޖެހެނީ މާލެ ދާންކަމަށް މައުލޫމާތު ހިއްސާކުރި މީހުން ބުންޏެވެ.
ހުޅުމާލެއިން ހުސްވެފައިވާކަމަށް ފާހަގަކުރެވިފައިވަނީ، އޮއިންޓްމެންޓް ސުޕިރޮސިން އެވެ. މިއީ ގައިގެ ތަންތަން މަށައިގެންދާ ތަންތަނުގައި އެޅުމަށް ބޭނުންކުރާ އުނގުޅާ ބޭހެކެވެ.
ހުޅުމާލޭ ސަރަހައްދުގައި ހިނގާ އެކްސިޑެންޓްތައްގިނަވެފައިވާއިރު، މިދުވަސްކޮޅު ގިނަބަޔަކު ހޮސްޕިޓަލަށް ހިދުމަތް ހޯދުމަށް ދާކަމަށް ވޮއިސްއަށް ވަނީ މައުލޫމާތު ލިބިފައެވެ. ނަން ހާމަކުރަން ޝަރުތުކޮށް ހުޅުމާލޭ ހޮސްޕިޓަލުގެ ނަރުހަކު ވޮއިސްއާ މައުލޫމާތު ހިއްސާކުރަމުން ބުނީ މިދުވަސްކޮޅު މަދުވެގެން 5 ވަރަކަށް މީހުން ކޮންމެ ދުވަހަކުވެސް ބޭސްއަޅަން އަންނަ ކަމަށެވެ. އެ އެންމެންނަކީވެސް މަގުމަތީގެ އެކްސިޑެންޓްތަކާ ގުޅިގެން ލިބޭ އަނިޔާގެ ސަބަބުން ބޭސްއަޅަން އަންނަ މީހުންކަމަށް ނަރުސް ބުންޏެވެ.
"ހުޅުމާލޭގައި މިހާ ބޮޑު އާބާދީއެއް އޮންނައިރު، އަދި މިހާ އެކްސިޑެންޓްތައް ހިނގާއިރު، އުނގުޅަންޖެހޭ ބޭސް ހޯދުމަށް މާލޭގެ ބޭސްފިހާރަތަކަށް ދާންޖެހުމަކީ ވަރަށްދެރަވަރުކަމެއް. މިހާރު ހޮސްޕިޓަލަށްވެސް ޖެހެނީ ފާރުގަނޑުގައި ބޭސް އަޅަންޏާ ބޭސްފުޅި ހިފައިގެންދާން. ހީވަނީ ސްޓޮކް ނެތީމަހެން އެހެން އެވަނީ" ވޮއިސް އާ ވާހަކަދެއްކި މީހަކު ބުންޏެވެ.
ހުޅުމާލޭގެ ބޭސްފިހާރަތަކުން ހުސްވި ކަމަށް ފާހަގަކުރެވުނު ބޭސް
މައުލޫމާތު ލިބިފައިވާ ގޮތުގައި ހުޅުމާލޭ ހޮސްޕިޓަލުން މިހާރު އެދެނީ ބޭސްއަޅަންދާއިރު، ބޭނުންވާ ބޭސްފުޅި ބޭސް ފިހާރައިން ގަނެގެން ދިއުމަށެވެ. މިގޮތަށް ނިންމާފައިވަނީ ހޮސްޕިޓަލުގެ ސްޓޮކުން މިވަގުތު ބޭސް މަދުވުމުންކަމަށް މައުލޫމާތު ލިބެއެވެ.
ވޮއިސްއިން ބެލިބެލުމުން އެސްޓީއޯ މާލޭ ބޭސް ފިހާރައިގަ އެ ބޭސް ހުއްޓެވެ. އަދި މާލޭގެ ބައެއް ބޭސް ފިހާރަތަކުގައިވެސް ބޭސް ލިބެން އެބަހުއްޓެވެ. މިކަމާ ގުޅޭގޮތުން ހެލްތުގެ ބަހެއް އަދި ނުލިބެއެވެ.
މި ފަހަކަށް އައިސް މާލެ ސަރަހައްދުގައި ހިނގާ އެކްސިޑެންޓްތައް އިތުރުވެފައިވާކަމަށް ފުލުހުންގެ ތަފާސްހިސާބުތަކުން ދައްކައެވެ. މީގެ ތެރެއިން އެންމެގިނައިން އެކްސިޑެންޓް ހިނގާކަމަށް ރެކޯޑް ކުރެވިފައިވަނީ ހުޅުމާލެ އަދި ސިނަމާލެބްރިޖާއި، ހައިވޭމަގުގައިކަން ފުލުހުންގެ ތަފާސްހިސާބުތަކުން ދައްކައެވެ.
Advertisement
This content is created and paid for by advertisers and does not involve Voice Journalists
