އައްޑޫ ސިޓީގައި އާދިއްތަ ދުވަހު ފެށުމަށް ހަމަޖެހިފައިވާ "ތާޒަ އައްޑޫ ޖޫނިއަރ އޯޕަން ބެޑްމިންޓަން ޗެންޕިއަންޝިޕް 2024" ގައި ވާދަކުރާ ނައިފަރު ބެޑްމިންޓަން ޓީމު މުބާރާތުގައި ވާދަކުރުމަށްޓަކައި އައްޑޫ ސިޓީއަށް ދިއުމަށް މިއަދު ފުރައިފިއެވެ. 

ނައިފަރު ޓީމުގެ ފަރާތުން ރަޝްވާން އަހުމަދު ވޮއިސް ސްޕޯޓްސްއަށް މައުލޫމާތު ދިން ގޮތުގައި މިއަދު އައްޑުއަށް ފުރި ޓީމުގައި ހިމެނެނީ 24 ކުޅުންތެރިންނެވެ. އޭގެތެރޭގައި ހިމެނެނީ 16 ފިރިހެން ކުޅުންތެރިންނާއި އަށް އަންހެން ކުޅުންތެރިންނެވެ. އަދި 10، 13، 15 އަދި 18 އަހަރުން ދަށުގެ ސިންގަލް އަދި ޑަބަލްސް އިވެންޓުގައި މިކުޅުންތެރިން ވާދަކުރާނެވެ.

އިތުރަށް ވާހަކަދައްކަމުން ރަޝްވާން ބުނީ މިފަދަ މުބާރާތެއްގައި ނައިފަރުން ޓީމެއް ބައިވެރިވުމުގެ އެންމެ ބޮޑު މަގުސަދަކީ ވާދަވެރި މުބާރާތެއްގައި ކުޅެލުމުގެ ފުރުސަތު މިކުދިންނަށް ހޯދައިދިނުމެވެ. އަދި މިފުރުސަތުގައި އަޅުގަނޑު ފާހަގަކޮށްލަން ބޭނުން މިމުބާރާތުގައި ބައިވެރިވުމަށް ނައިފަރުގެ ކައުންސިލާއި ކުޅުންތެރިންގެ ބެލެނެވެރިންގެ ފަރާތުން ލިބުނު އެއްބާރުލުމާއި އެހީތެރިކަން..

މީގެ އިތުރުން މިމުބާރާތުގައި ވާދަކުރާ ނައިފަރު ޓީމާއެކު ބެޑްމިންޓަން އެކަޑަމީ އޮފް ނައިފަރުގެ ފަރާތުން ކޯޗުންގެ ގޮތުގައި، ހުސެއިން ރަޝީދު، އަބްދުﷲ ރައޫފް، ޝަރުވަތު އިބްރާހިމް އަދި ރަޝްވާ އަހުމަދު ވަނީ ބައިވެރިވެފައެވެ.

29 ސެޕްޓެންބަރު 2024 އިން 03 އޮކްޓޯބަރު 2024 ގެ ނިޔަލަށް އައްޑޫ ސިޓީގައި މުޅި ރާއްޖެއަށް ހުޅުވާލެވިގެން ކުރިއަށް ގެންދިއުމަށް ހަމަޖެހިފައިވާ މިމުބާރާތުގައި މިއަހަރު މާލޭ ސިޓީގެ އިތުރުން ނ.ހޮޅުދޫ، ބ. އޭދަފުށި އަދި ޅ. ނައިފަރުން ވަނީ ޓީމުތައް ބައިވެރިވެފައެވެ.