މިއީ ކުރިންވެސް ޔަގީންވެގެން ދިޔަކަމެކެވެ. ރޮބޯމޭން ކެރެކްޓާއަށް އޮތް ލޯބި، "ރޮބޯމޭން" ފިލްމަށްވެސް ލިބިގެންދާނެ ކަމެވެ. ކަންތައް ވެގެންދިޔައީ ޔަގީންކުރި ގޮތަށެވެ. ރޮބޯމޭން ފިލްމް އިއްޔެ ވަނީ ޕްރިމިއާ ކޮށްފައެވެ. ލިބުނު ތަރުހީބް ބޮޑުވެގެން އެންމެފަހުން ޖެހުނީ ދެޝޯ ބާއްވަން ނިންމައި ޕްރިމިއާ ޑޭއަށް ހަދާށެވެ. މިއީ ދިވެހިސިނަމާއަށް އައި މިފަދަ ފުރަތަމަ ދުވަހެވެ. 

"ރޮބޯމޭން" ފިލްމް ރެޑް ކާޕެޓްގައި އިއްޔެ ޕްރިމިއާ ކުރުމުގެ ހަފްލާގައި ފިލްމްގެ ކާސްޓުންގެ އިތުރުން ގިނަ އަދަދެއްގެ ފަރާތްތަކުން ވަނީ ބައިވެރިވެފައެވެ. މި ފިލްމަކީ މިހާތަނަށް ދިވެހި ފިލްމެއްގައި އެންމެ ބޮޑު އޯޑިއަންސެއް ހިއްސާވި ފިލްމަށް ވީއިރު، އެކަން އިއްޔެ އޮލިމްޕަހުން ކިތަންމެ ރަނގަޅަކަށްވެސް ފެނިގެންދިޔައެވެ. 

"ރޮބޯމޭން" ޓީމުން ބުނީ ފިލްމް ޕްރިމިއާ ކުރުމާއެކު 6 ޝޯ ހައުސް ފުލްވެފައިވާކަމަށެވެ. ކުރިއަށްއޮތް ދިހަ ދުވަސް ވަންދެން ކޮންމެ ދުވަހަކު މި ފިލްމުގެ ދެ ޝޯ ބޭއްވުމަށް ނިންމާފައިވާކަމަށެވެ. ޝޯތައް ބޭއްވުމަށް ހަމަޖެހިފައިވަނީ، މެންދުރުފަހު 14:00 އާއި ހަވީރު 16:00 ޖަހާއިރުއެވެ. މިދުވަސްވަރަކީ ސްކޫލް ޗުއްޓީ ދުވަސްވަރުކަމުން މި ފިލްމު ބެލުމަށް ހަދާލާފައި އޮތީ ދިގު ކިއުއެކެވެ. މިކަމުގައި އަދި އެހެން ސަބަބެއްވެސް އެބައޮތެވެ. ދިވެހި ސިނަމާއަށް ކުޑަކުދިންގެ ފިލްމެއް މިއައީ ގިނަ އަހަރުތަކެއް ފަހުންނެވެ. 

"ރޮބޯމޭން" ޕްރިމިއާ ޑޭގެ ތެރެއިން.... ފޮޓޯ: ރޮބޯމޭން ޓީމް

"ރޮބޯމޭން – ދަ މޫވީ" އަކީ އެހެން ފިލްމްތަކާ ތަފާތު ފިލްމެކެވެ. މި ފިލްމަކީ ކުދި ބޮޑު އެންމެނަށްވެސް ހާއްސަ ފިލްމެކެވެ. "ރޮބޯމޭން – ދަ މޫވީ" ވެގެންދާނީ މިހާތަނަށް އެންމެގިނަ ކުޑަކުދިންގެ ބައިވެރިވުމާއެކު ހެދި ފިލްމަށެވެ. މި ފިލްމު ގެނެސްދީފައިވަނީ "ދަ ރޮބޯ ޖޫނިއާ ޗެލެންޖު" ކުޑަކުދިންގެ ޑާންސް މުބާރާތެއްގެ ތެރެއިން ކުރިމަތިވާ އެކި ކަހަލަ ކަންތައްތަކެވެ. މި ފިލްމުގެ ވާހަކަ ބިނާކޮށްފައިވަނީ ކުޑަކުދިންގެ އިތުރުން ބޮޑެތިމީހުންވެސް ވަރަށް ޝައުގުވެރިކުރުވާނެ ގޮތަކަށެވެ. ރޮބޯމޭންގެ ވާހަކަ ލިޔުނީ، ކުޅަދާނަ ވާހަކަލިޔުންތެރިޔާ މަހުދީ އިމާދެވެ. 

"ރޮބޯމޭން" ޕްރިމިއާ ޑޭގެ ތެރެއިން.... ފޮޓޯ: ރޮބޯމޭން ޓީމް

"ރޮބޯމޭން – ދަ މޫވީ" ގެ މެއިން ކާސްޓުންގެ ގޮތުގައި ފެނިގެންދާނީ، އަމީލިއާ ނަސްރުﷲ އާއި މިޝާ އިސްމާއިލެވެ. ފިލްމުގައި ރޮބޯމޭން ފެނިގެންދާނީ ހަމަ އެ ކެރެކްޓާގެ ގޮތުގައެވެ.

ރޮބޯމޭން ޓީމުން ބުނީ އޮލިމްޕަހުގައި ފިލްމު ދެއްކުމަށްފަހު މި ފިލްމުގެ އިތުރު ޝޯތައް ހުޅުމާލޭގައި ދައްކާނޭ ކަމަށެވެ. އަދި އަތޮޅުގެ ރަށްތަކަށްވެސް ފިލްމު ދެއްކުމުގެ ކަންކަން ކުރިއަށްގެންދާނޭކަމަށް ރޮބޯމޭން ޓީމުން ބުނެއެވެ. 

"ރޮބޯމޭން" ޕްރިމިއާ ޑޭގެ ތެރެއިން.... ފޮޓޯ: ރޮބޯމޭން ޓީމް

ރޮބޯމޭންއަކީ މިހާރު ކުޑަކުދިންގެ އިތުރުން އެކި އުމުރުފުރާގެ މީހުންގެ މެދުގައި ވަރަށްބޮޑު މަޤްބޫލުކަމެއް ލިބިފައިވާ ކެރެކްޓާއެކެވެ. ހާއްސަ ކޮސްޓިއުމާކާއެކު މޫނުގައި އަޅިކުލައިގެ މާސްކެއް އަޅާފައި ހުންނަ ރޮބޯމޭން ރާއްޖޭގެ އެކި ކަންކޮޅުތަކުގައި ޝޯތައް ދެމުން އަންނައިރު، ރޮބޯމޭންގެ ކެރެކްޓާ ވަނީ ރާއްޖޭގެ އަސްދަނޑިން ބޭރަށް ޔޫރަޕްގެ ޤައުމުތަކުގައިވެސް ޝޯތައް ދީފައެވެ.

ރޮބޯމޭންއަކީ ދިވެއްސަކު އޭނާގެ އަމިއްލަ ހިޔާލަށް ބިނާކޮށް އުފައްދާފައިވާ ކެރެކްޓާއެކެވެ. ހުނަރުވެރި ފަންނުވެރި، މަސައްކަތްތެރި ޒުވާނުން ޤައުމީ ތަރައްޤީއަށް ކުރާ އުފެއްދުންތެރި އީޖާދީ މަސައްކަތުގައި ފާހަގަކޮށްލެވޭ ފަދަ ކާމިޔާބީއެއް ހޯދާފައިވާތީވެ، ރޮބޯމޭންގެ ކެރެކްޓާއަށް ވަނީ ރައީސުލްޖުމްހޫރިއްޔާ ދެއްވާ ޚާއްޞަ އިނާމުވެސް ހާސިލްކޮށްފައެވެ. މިއީ ދިވެއްސަކު އީޖާދުކުރި މިފަދަ ކެރެކްޓާއެއް ރައީސުލްޖުމްހޫރިއްޔާ ދެއްވާ ހާއްސަ އިނާމް ހާސިލްކުރި ފުރަތަމަ ފަހަރެވެ.