ލުބުނާނުގެ ހިޒްބުﷲ ޖަމާއަތުގެ ވެރިޔާ، ސައްޔިދު ހަސަން ނަސްރުﷲ އަވަހާރަކޮށްލާފައިވާކަން ހިޒްބުﷲ އިން ކަށަވަރުކޮށްދީފިއެވެ.
32 އަހަރު ވަންދެން ހިޒްބުﷲ ގެ ލީޑަރުކަމުގެ މަގާމު ފުރުއްވި ނަސްރުﷲ އަވަހާރަކޮށްލިކަން ކަށަވަރުކޮށްދީ އެ ޖަމާއަތުން ނެރުނު ބަޔާނެއްގައި ބުނީ، މަތިވެރި ޝަހީދެއްގެ ގޮތުގައި އެމަނިކުފާނު ދުނިޔެ ދޫކުރައްވާފައިވާކަމަށެވެ.
މިއާއިއެކު ހިޒްބުﷲ އިން ވަނީ ނަސްރުﷲ އަވަހާރަވި ނަމަވެސް ޖިހާދަށް ބަދަލުނާންނާނެ ކަމަށާއި، ޣައްޒާއާއި ފަލަސްޠީނަށް އެހީތެރިވުމަށާއި، ލުބުނާނުގެ ރައްޔިތުން ދިފާޢުކުރާނެ ކަމުގެ ޔަގީންކަން ދެއްވާފައެވެ.
ހިޒްބުﷲ އިން މިފަދައިން ބުނި ނަމަވެސް، ނަސްރުﷲ އަށް ފަހު އެ ޖަމާއަތުގެ ވެރިޔަކަށް އައްޔަންކުރާނެ ފަރާތަކާއި، ނަސްރުﷲ އަވަހާރަކޮށްލުމާ ގުޅިގެން ޖަމާޢަތުން އަމަލުކުރާނެ ގޮތެއް ހާމަކޮށްފައެއް ނުވެއެވެ.
މިކަމާއި ގުޅޭގޮތުން ޔަހޫދީންގެ ޣައިރު ގާނޫނީ ދައުލަތް، އިސްރާއީލުން ބުނިގޮތުގައި، ނަސްރުﷲ އަވަހާރަކޮށްލީ، ބެއިރުތުގެ ދެކުނު ސަރަހައްދެއްކަމަށްވާ ދަހިޔޭގައި ހުރި އިމާރާތެއްގެ ދަށުގައިވާ ހިޒްބުﷲގެ މަރުކަޒަކަށް އަމާޒުކޮށް ދިން ހަމަލާއެއްގައިއެވެ.
ނަސްރުﷲ އާއިއެކު، ހިޒްބުﷲގެ އިސް ފަރާތެއް ކަމަށްވާ ޢަލީ ކަރަޚީ އާއި އެހެން ކޮމާންޑަރުންތަކެއްވެސް އަވަހާރަކޮށްލާފައިވާކަމަށް ޔަހޫދީން ނެރުނު ބަޔާނުގައިވެއެވެ.
މަސްރަހު ދިރާސާ ކުރާ ފަރާތްތަކުން ދެކޭ ގޮތުގައި، ނަސްރުﷲ އަވަހާރަވުމަކީ ހިޒްބުﷲ ގެ އިތުރުން އީރާނަށް ވެސް ލިބޭނެ ވަރަށް ބޮޑު ގެއްލުމެކެވެ. އެއާއިއެކު، އީރާނާއި ހިޒްބުﷲ އިން، ނަސްރުﷲގެ މަރުގެ ބަދަލު ހިފުމަށް އިސްރާއީލާއި ދެކޮޅަށް ވަރުގަދަ ހަމަލާތަކެއް ދޭނެ ކަމަށް އެފަރާތްތަކުން ލަފާކުރެއެވެ.
މީގެ ކުރިން އީރާނުގެ ރައީސް ގެ ހުވާ ކުރެއްވުމަށް ވަޑައިގެން ހުންނަވަނިކޮށް، އިސްރާއީލުން ފަލަސްތީނުގެ ހަމާސް ޖަމާއަތުގެ އިސް ލީޑަރު އިސްމާއިލް ހަނިއްޔާވެސް އަވަހާރަކޮށްލާފައިވާކަން ފާހަގަކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
