މި އަހަރުގެ ފުރަތަމަ އަށް މަސްދުވަހު ފުލުހުންގެ މަސްތުވާތަކެއްޗާ ދެކޮޅަށް ހިންގި އޮޕަރޭޝަން ތަކުގައި 282 މިލިއަން ރުފިޔާގެ މަސްތުވާތަކެތި އަތުލައިގެންފައުވާ ކަމަށް ފުލުހުން ބުނެފިއެވެ.
މި މުއްދަތުގައި 158 ކިލޯއަށްވުރެ ގިނަ މަސްތުވާތަކެތި އަތުލައިގަނެވިފައިވާ ކަމަށް ދިވެހި ފުލުހުންގެ ޚިދުމަތުން ބުނެފިއެވެ.
ޖަނަވަރީ މަހުން ފެށިގެން އޮގަސްޓް މަހުގެ ނިޔަލަށް ޑްރަގް އެންފޯސްމަންޓް ޑިޕާޓްމަންޓުން ކުރި މަސައްކަތްތަކުގެ ތަފާސްހިސާބު ފުލުހުން މިއަދު ޢާންމުކޮށްފައިވާއިރު، އެއިން އެނގޭ ގޮތުން މުއްދަތުގައި 113 އޮޕަރޭޝަން ހިންގައި، 8،554 މީހުން ބަލައި ފާސްކޮށް، 712 މީހުން ހައްޔަރުކުރެވިފައިވެއެވެ.
އަދި 80 ބިދޭސީން އިމިގްރޭޝަނާ ހަވާލުކުރެވިފައިވާކަންވެސް ފާހަގަކޮށްފައިވެއެވެ.
ފުލުހުންގެ މި އޮޕަރޭޝަން ތަކުގައި އަތުލެވުނު ތަކެތީގެ ތެރޭގައި 158.8 ކިލޯއަށްވުރެ ގިނަ މަސްތުވާތަކެއްޗާއި 5،252 ބަނގުރާ ފުޅި ހިމެނެއެވެ. މި ތަކެތީގެ މަގުމަތީ އަގު 282 މިލިއަން ރުފިޔާއަށްވުރެ އިތުރުވާ ކަމަށް ފުލުހުން ބުނެފައިވެއެވެ.
މީގެ އިތުރުން، މި މުއްދަތުގައި މަސްތުވާތަކެއްޗާ ގުޅުންހުރި 475 މައްސަލަ ހުށަހެޅި، އޭގެ ތެރެއިން 230 މައްސަލަ ޕްރޮސިކިއުޓަރ ޖެނެރަލްގެ އޮފީހަށް ފޮނުވިފައިވާކަން ފުލުހުންގެ ތަފާސްހިސާބުތަކުން ދައްކައެވެ.
Advertisement
This content is created and paid for by advertisers and does not involve Voice Journalists
