ހިދުމަތުގެ ފެންވަރު ރަނގަޅުކުރުމުގައި ބަލިމީހާގެ ރައްކާތެރިކަން ނުވަތަ ފަރުވާގެ ސަބަބުން ގެއްލުމެއްވެނުދިނުމުގެ މަތިވެރި މަޤުޞަދު އަބަދުމެ އިސްކުރުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އަބިކަނބަލުން ސާޖިދާ މުޙައްމަދު އިލްތިމާސްކުރައްވައިފިއެވެ.

މެޑަމް ސާޖިދާ މިފަދައިން ވިދާޅުވީ، ބައިނަލްއަޤްވާމީ ގޮތުން ފާހަގަކުރާ ބަލިމީހުންގެ ރައްކާތެރިކަމުގެ ދުވަހާއި ގުޅިގެން އައްޑޫ ސިޓީގައި ކުރިއަތް ގެންދިޔަ ޚާއްސަ ކޮންފަރެންސް ޝަރަފުވެރިކޮށްދެއްވާ ވާހަކަފުޅުދައްކަވަމުންނެވެ.

މިގޮތުން މެޑަމް ސާޖިދާ ވިދާޅުވީ، ބަލިމީހުންގެ ސަލާމަތަށްޓަކައި އައު އުސޫލުތަކާއި އައު ވަސީލަތްތައް ތަޢާރަފްކުރެވި ފުރިހަމައަށް އެކަންކަން ތަންފީޒު ކުރެވެން ފަށާ ދުވަހަކީ ދިވެހި ސިއްޙީ ދާއިރާ އައު އުސްމިންތަކަކަށް ދަތުރުކުރާ ދުވަސް ކަމަށެވެ.

ބަލިމީހާގެ ރައްކާތެރިކަމަށް މަސައްކަތްކުރުމަކީ ޞިއްޙީ ނިޒާމުގައި ހިމެނޭ ހުރިހާފަރާތްތަކެއްގެ ޝާމިލުވުން ބޭނުންވާކަމެއްކަމަށް ވެސް މެޑަމް ސާޖިދާ ވިދާޅުވިއެވެ.

ބަލިމީހާއަށް ފަރުވާ ދެވޭގޮތުންނާއި ދެވޭފަރުވާގެ ބާވަތުން ހަށިގަނޑަށް ބޮޑެތި ގެއްލުންވުމާއި ފުރާނައަށް ގެއްލުންވުމަކީ ބައެއް ފަހަރު ރާއްޖޭގައި ވެސް ތަޖުރިބާ ކުރެވޭކަމެއްކަން ފާހަގަކުރައްވައި، މެޑަމް ސާޖިދާ ވަނީ ޚިދުމަތް ދިނުމުގައި ފަރުވާތެރިވެ މިފަދަ ކަންކަން މަދުކުރުމަށް ނުވަތަ ނައްތާލުމަށް އެދިވަޑައިގެންފައެވެ. 

ހަމައެއާއިއެކު،  އެކަމުގައި ޤައުމީ ފެންވަރުގައި ހުރިހާ ލެވެލެއްގައި މަޝްވަރާކޮށް ނިންމުންތަކެއް ނިންމައި ދާއިރާއަށް އިންޤިލާބީ ބަދަލެއް ގެނައުމަށް މަސައްކަތްކުރުމާއި ބަލިމީހުންގެ ސަލާމަތަށްޓަކައި އާ އުޞޫލުތަކާއި އާ ވަޞީލަތްތައް ތަޢާރަފުކުރުމުގެ މުހިންމުކަމާއި މެދު ވެސް މެޑަމް ސާޖިދާގެ ވާހަކަފުޅުގައި އަލިއަޅުވައިލެއްވިއެވެ.

މި ކޮންފަރެންސްގެ ތެރެއިން މެޑަމް ސާޖިދާ، "ޕޭޝަންޓް ސޭފްޓީ ސްޓްރެޓެޖިކް ޕްލޭން" އިފްތިތާޙް ކޮށްދެއްވާފައިވާއިރު، އެކަމަނާވަނީ ޕޭޝަންޓް ސޭފްޓީ ކޮމިޓީ އިފްތިތާޙްކޮށްދެއްވައި އެކޮމެޓީގެ މެންބަރުންނަށް ޕިން ހަވާލުކޮށްދެއްވާފައެވެ.