ހައްދުފަހަނަ އަޅާފައިވާ އިސްރާއީލުގެ ސިފައިން ލުބުނާނުގެ ބެއިރުތުގެ ރަފީޤް ހަރީރީ އިންޓަރނޭޝަނަލް އެއަރޕޯޓުގެ ކޮންޓްރޯލް ޓަވަރު ހެކްކޮށް، އެ އެއާޕޯޓަށް ޖެއްސުމަށް މަސައްކަތްކުރި އީރާނުގެ މަދަނީ މަތިންދާބޯޓަކަށް އިންޒާރުދީފިއެވެ.

އިސްރާއީލުގެ އިންޒާރުތަކާ ގުޅިގެން، އެ މަތިންދާބޯޓު ލުބުނާނުގެ ވައިގެ ސަރަޙައްދަށް ވަނުން ހުއްޓުވުމަށް ލުބުނާނުގެ ޓްރާންސްޕޯޓް މިނިސްޓްރީން އެއަރޕޯޓުގެ އިސްވެރިންނަށް އެންގިއެވެ.

މިނިސްޓްރީގެ ފަރާތްތަކުން ކަށަވަރުކޮށްދިން ގޮތުގައި، މިފަދައިން ނިންމާފައިވަނީ ޔަހޫދީ ފައުޖުގެ އަމަލުތަކާއި ގުޅިގެންނެވެ.

Advertisement

ޔަހޫދީ ފައުޖުން އަންނަނީ ހިޒްބުﷲ އަށް ހަތިޔާރު ފަހިކޮށްދޭނެ މަގުތައް ބަންދު ކުރަން މަސައްކަތް ކުރަމުންނެވެ.

މިގޮތުން އީރާނަކީ ހިޒްބުﷲ އަށް ހަތިޔާރު ފޯރުކޮށްދޭ މައިގަނޑު އެއް ގައުމަށް ވާއިރު، އިސްރާއީލުން ގަބޫލު ކުރާގޮތުގައި، އީރާނުން ހިޒްބުﷲ އަށް ހަތިޔާރު ފޯރުކޮށްދެނީ ބެއިރޫތު އިންޓަރނޭޝަނަލް އެއަރޕޯޓު މެދުވެރިކޮށެވެ.

އިސްރާއީލުގެ މި ދައުވާތައް ދޮގުކުރައްވަމުން، ލުބުނާނުގެ ޢާންމު މަސައްކަތްތަކާއި ދަތުރުފަތުރުގެ ވަޒީރު ޢަލީ ހަމީހް ވިދާޅުވީ، އެ އެއާޕޯޓަކީ ހަމައެކަނި މަދަނީ އެއަރޕޯޓެއް ކަމަށާއި، ބެއިރޫޓު އެއަރޕޯޓުގައި ހިންގާ ސިފައިންގެ ވައިގެ ދަތުރުތައް ހުއްދަކުރެވެނީ ހަމައެކަނި ލުބުނާނުގެ ސިފައިންގެ ހުއްދައާ އެކުގައިކަމަށެވެ.