ނޭޕާލަށް ވާރޭވެހި ބިންގަނޑު ކަނޑައިގެން ދިޔުމުގެ ސަބަބުން 112 މީހުން މަރުވެއްޖެއެވެ.

މި ކާރިސާގައި 100 އަށްވުރެ ގިނަ މީހުން ވަނީ ޒަޚަމްވެފައިވާއިރު، އެ ޤައުމުގެ އެކި ސަރަޙައްދުތަކުގައި ހުކުރު ދުވަހުން ފެށިގެން ފެންބޮޑުވުމުގެ ސަބަބުން 68 މީހުން ވަނީ ގެއްލިފައެވެ.

ނޭޕާލުގެ ފުލުހުންގެ އިސް އޮފިޝަލެއް ބުނާ ގޮތުގައި މިހާތަނަށް ފެންބޮޑުވުމާއި ބިންގަނޑު ކަނޑައިގެން ދިއުމުގެ 200 ހާދިސާ ރިޕޯޓުކުރެވިފައިވާއިރު، ކުރިއަށް އޮތް ތަނުގައި މި އަދަދު އިތުރުވާނެއެވެ.

މިއީ ފާއިތުވެ ދިޔަ 54 އަހަރުގެ ތެރޭގައި އެގައުމަށް އެންމެ ބޯކޮށް ވާރޭވެހުން އަހަރަށްވާއިރު، މިދިޔަ 24 ގަޑިއިރުގެ ތެރޭގައި 323 މިލިމީޓަރުގެ ވާރޭ ވަނީ ވެހިފައެވެ.

އެގައުމުގެ ނެޝަނަލް ޑިޒާސްޓަރ ރިސްކް ރިޑަކްޝަން މެނޭޖްމަންޓް އޮތޯރިޓީ (އެންޑީއާރްއާރްއެމްއޭ) އިން ބުނާ ގޮތުގައި މިކަމުގެ ސަބަބުން 412،000 ގޭބިސީއަށް އަސަރުކުރާނެ ކަމަށް ލަފާކުރެވޭއިރު، މީހުން ސަލާމަތްކުރުމުގެ މަސައްކަތްތަކަށް އެހީތެރިވުމަށް 3،000 އަށްވުރެ ގިނަ ސެކިއުރިޓީ މުވައްޒަފުން ވަނީ ހެލިކޮޕްޓަރުތަކާއި މޯޓަރު ބޯޓުތަކާއެކު ފޮނުވާފައެވެ.

ނޭޕާލަށް މިހާރު ވެހެމުންދާ ވާރޭގެ ސަބަބުން ވެރިރަށް ކަޓްމަންޑޫގެ ވަށައިގެންވާ ކޯރުތައް ބަންޑުންވެ، ކައިރީގައިވާ ގެތަކަށް ފެން ވަދެފައިވާއިރު، ކަޓްމަންޑޫގެ މައި ކޯރު ކަމުގައިވާ ބަގްމަތީ ކޯރުވެސް ވަނީ ގަދަ ވާރޭގެ ސަބަބުން ނުރައްކާތެރި މިންވަރަށް އުފުލިފައެވެ.

ދެކުނު އޭޝިއާގައި މޫސުމީ ވާރޭގެ ސަބަބުން މިފަދަ ކާރިސާތައް ކުރިމަތިވުމަކީ އާންމު ކަމަކަށްވީ ނަމަވެސް، މާހިރުން ބުނާ ގޮތުގައި މޫސުމަށް އަންނަ ބަދަލުތަކުގެ ސަބަބުން މިފަދަ ކާރިސާތަކުގެ ނުރައްކާތެރިކަމާއި ތަކުރާރުވާ މިންވަރު ދަނީ އިތުރުވަމުންނެވެ.