އިސްރާއީލުގެ އަނިޔާވެރި ސިފައިން ދިން ހަމަލާއެއްގައި އަވަހާރަކޮށްލި ލުބުނާނުގެ ހިޒްބުﷲ ޖަމާއަތުގެ ވެރިޔާ، ސައްޔިދު ހަސަން ނަސްރުﷲ ގެ ލޭގެ ބަދަލު ހިފާނެކަމަށް އިރާނުގެ ސުޕްރީމް ލީޑަރު އާޔަތުﷲ އަލީ ޚާމައިނީ ވިދާޅުވެއްޖެއެވެ.
ނަސްރުﷲ އަވަހާރަވުމާއި ގުޅިގެން ދެއްވި ބަޔާނެއްގައި ޚާމައިނީ ވިދާޅުވީ، ނަސްރުﷲގެ މަރުގެ ބަދަލު ނުހިފާ ދޫކޮށްނުލާނެ ކަމަށެވެ.
ނަސްރުﷲ އަކީ "މަގެއް އަދި ވިސްނުމުގެ މަދަރުސާއެއް" ގެ ގޮތުގައި ސިފަ ކުރައްވަމުން ޚާމައިނީ ވަނީ ނަސްރުﷲ ގެ ހިންގެވި މަގުން ކުރިއަށްދާނެ ކަމަށް ވިދާޅުވެފައެވެ.
ނަސްރުﷲ އަވަހާރަވުމާއިއެކު، އީރާނުގައި ވަނީ 5 ދުވަހުގެ ގައުމީ ހިތާމަ ވެސް އިއުލާނުކޮށްފައެވެ.
ނަސްރުﷲ އަވަހާރަކޮށްލީ، ބެއިރުތުގެ ދެކުނު ސަރަހައްދެއްކަމަށްވާ ދަހިޔޭގައި ހުރި އިމާރާތެއްގެ ދަށުގައިވާ ހިޒްބުﷲގެ މަރުކަޒަކަށް އަމާޒުކޮށް ޔަހޫދީ ފައުޖުން ދިން ހަމަލާއެއްގައެވެ.
އިރާނުގެ މީޑިއާތަކުން ރިޕޯޓުކޮށްފައިވާ ގޮތުގައި، މި ހަމަލާގައި އިރާނުގެ އިންޤިލާބީ ގާޑުގެ ޖެނެރަލެއްވެސް ވަނީ އަވަހާރަކޮށްލާފައެވެ.
32 އަހަރު ވަންދެން ހިޒްބުﷲ ގެ ލީޑަރުކަމުގެ މަގާމު ފުރުއްވި ނަސްރުﷲ އަވަހާރަކޮށްލިކަން ކަށަވަރުކޮށްދީ އެ ޖަމާއަތުން ނެރުނު ބަޔާނެއްގައި ބުނީ، މަތިވެރި ޝަހީދެއްގެ ގޮތުގައި އެމަނިކުފާނު ދުނިޔެ ދޫކުރައްވާފައިވާކަމަށެވެ.
މިއާއިއެކު ހިޒްބުﷲ އިން ވަނީ ނަސްރުﷲ އަވަހާރަވި ނަމަވެސް ޖިހާދަށް ބަދަލުނާންނާނެ ކަމަށާއި، ޣައްޒާއާއި ފަލަސްޠީނަށް އެހީތެރިވުމަށާއި، ލުބުނާނުގެ ރައްޔިތުން ދިފާޢުކުރާނެ ކަމުގެ ޔަގީންކަން ދެއްވާފައެވެ.
މަސްރަހު ދިރާސާ ކުރާ ފަރާތްތަކުން ދެކޭ ގޮތުގައި، ނަސްރުﷲ އަވަހާރަވުމަކީ ހިޒްބުﷲ ގެ އިތުރުން އީރާނަށް ވެސް ލިބޭނެ ވަރަށް ބޮޑު ގެއްލުމެކެވެ. އެއާއިއެކު، އީރާނާއި ހިޒްބުﷲ އިން، ނަސްރުﷲގެ މަރުގެ ބަދަލު ހިފުމަށް އިސްރާއީލާއި ދެކޮޅަށް ވަރުގަދަ ހަމަލާތަކެއް ދޭނެ ކަމަށް އެފަރާތްތަކުން ލަފާކުރެއެވެ.
Advertisement
This content is created and paid for by advertisers and does not involve Voice Journalists
