އިންޑިއާއަށް އދގެ ސަލާމަތީ މަޖިލީހުގެ ގޮނޑިއެއް ދިނުމަށް ދުނިޔޭގެ ގައުމުތަކުގެ ލީޑަރުން ގޮވާލައިފިއެވެ.

އދގެ އާއްމު މަޖިލީހުގެ 79 ވަނަ ސެޝަން ފެށުމުގެ ގޮތުން ވާހަކަ ދައްކަވަމުން އެމެރިކާގެ ރައީސް ޖޯ ބައިޑެންއާއި، ފަރަންސޭސީވިލާތުގެ ރައީސް އެމަނުއެލް މެކްރޮންގެ އިތުރުން އިނގިރޭސިވިލާތުގެ ބޮޑުވަޒީރު ކެއަރ ސްޓާމާރ ވަނީ އެކަމަށް ތާއީދުކޮށް ވާހަކަ ދައްކަވާފައެވެ. މި ތިން ޤައުމަކީވެސް ސަލާމަތީ މަޖިލީހުގެ ދާއިމީ ފަސް މެމްބަރުންގެ ތެރޭގައި ހިމެނޭ ގައުމެވެ. 

އދގެ ސަލާމަތީ މަޖިލީހުގައި ތިބެނީ ދާއިމީ 5 މެމްބަރުންކަމަށްވާ އެމެރިކާ، އިނގިރޭސިވިލާތް، ފަރަންސޭސީވިލާތް، ޗައިނާ އަދި ރަޝިޔާގެ އިތުރުން 2 އަހަރުގެ ދައުރަކަށް ހޮވޭ އިތުރުނ 10 ޤައުމެވެ. ސަލާމަތީ މަޖިލީހުގެ ދާއިމީ 5 މެމްބަރުންނަކީ ވީޓޯ ކުރުމުގެ ބާރު އޮންނަ ޤައުމުތައްކަމުން، ސަލާމަތީ މަޖިލީހަށް އެއިން ޤައުމަކުން ނުރުހޭ މައްސަލައެއް އަޔަސް، އެހެން ހުރިހާ ޤައުމަކުން ތާއީދުކުރިނަމަވެސް އެމައްސަލައެއް ކުރިއަށް ގެންދެވޭ ގޮތެއް ނުވެއެވެ. މި ސަބަބާހެދި ދާއިމީ މެމްބަރުންގެ މައްސަލައާއި ވީޓޯގެ މައްސަލައަކީ އދގެ އެހެން މެމްބަރުން ގައުމުތަކުން އާއްމު މަޖިލީހުގައި ވަރަށް ގިނައިން ނަގާ މައްސަލައެކެވެ. 

އާއްމު މަޖިލީހުގައި ވާހަކަ ދައްކަވަމުން އިނގިރޭސި ބޮޑުވަޒީރު ސްޓާމާރ ވިދާޅުވީ އެފްރިކާގެ ބައިވެރިވުން ސަލާމަތީ މަޖިލީހުގައި އޮންނަން ޖެހޭނެކަމަށެވެ. އަދި އިންޑިއާ، ބްރެޒިލް، ޖަޕާން އަދި ޖަރުމަންވިލާތް ދާއިމީ މެމްބަރުންގެ ގޮތުގައި ތިބެން ޖެހޭކަމަށާއި، ސަލާމަތީ މަޖިލީހުގައި އިތުރު މެމްބަރު ގައުމުތައް ތިބެން ޖެހޭނެކަމަށް އެމަނިކުފާނު ވިދާޅުވިއެވެ. 

ފަރަންސޭސީވިލާތުގެ ބޮޑުވަޒީރުގެ މެކްރޮންގެ ވާހަކަފުޅުގައިވެސް، ސަލާމަތީ މަޖިލީހުގެ މިހާރުގެ ހާލަތު އޮތްގޮތުން މައްސަލަތައް ކުރިއަށް ގެންދިޔުމަށް އުނދަގޫވާ ކަމަށާއި، އިންޑިއާ، ބްރެޒިލް، ޖަޕާން އަދި ޖަރުމަންވިލާތް ދާއިމީ މެމްބަރުންގެ ގޮތުގައި ސަލާމަތީ މަޖިލީހުގައި ތިބެން ޖެހޭނެކަމަށް ވިދާޅުވިއެވެ. އަދި އެފްރިކާ ބައްރުގެ ބައިވެރިވުން ސަލާމަތީ މަޖިލީހުގައި އިތުރު ކުރަން ޖެހޭކަމަށް މެކްރޮންވެސް ވަކާލާތު ކުރެއްވިއެވެ.

އިންޑިއާގެ ބޮޑުވަޒީރު ނަރެންދްރަ މޯދީއާއިއެކު ޑެލަވެއަރގައި ބޭއްވި ބައްދަލުވުމެއްގައި އެމެރިކާގެ ރައީސް ޖޯ ބައިޑެންވެސް ވަނީ އިންޑިއާއަށް ސަލާމަތީ މަޖިލީހުގެ ދާއިމީ މެމްބަރުކަން ދިނުމަށް ތާއީދުކޮށް ވާހަކަ ދެއްކެވިއެވެ.