ވިލާ ކޮލެޖުން އެންމެ އިސްކަމެއްދެނީ ވަޒީފާގެ މައިދާނަށް ފައްކާވެފައިވާ ދަރިވަރުންތަކެއް ބިނާކުރުމަށްކަމަށް އެ ކޮލެޖްގެ ވައިސް ރެކްޓަރ ޑރ. އަލީ ނަޖީބް ވިދާޅުވެއްޖެއެވެ.

ވިލާ ކޮލެޖުން މިރޭ ވަނީ އެ ކޮލެޖުން ބޭއްވި ގްރެޖުއޭޝަން ދެ ހަފްލާގެ ނިމުން ފާހަގަކުރުމަށް ސްޓޫޑެންޓް އެޗީވްމެންޓް އެވޯޑް ހަފްލާއެއް ބާއްވާފައެވެ. މިދިޔަ އަހަރާއިމިއަހަރު ވިލާ ކޮލެޖުން ކުރިއަށްގެންދިޔަ 53 ޕްރޮގްރާމަކުން ދަސްވެނިވުނު 1237 ދަރިވަރަކު ވަނީ ސަނަދު ހާސިލްކޮށްފައެވެ.  ސެޓްފިކެޓް ލެވެލްތަކުންނާއި ޑިޕްލޮމާ ލެވެލްތައް ހިމަނައިފިނަމަ ދަސްވެނިވުނު ދަރިވަރުންގެ އަދަދު އިތުރުވާނޭކަމަށް ނަޖީބް ވިދާޅުވިއެވެ.

މިރޭގެ ހަފްލާގައި ވިލާ ކޮލެޖްގެ ވައިސް ރެކްޓަރ ނަޖީބް ވިދާޅުވީ، ވިލާ ކޮލެޖްގެ ޕްރޮގްރާމްތައް ފަރުމާކޮށްފައިވާނީ ރާއްޖޭގެ ވަޒީފާގެ ބާޒާރަށާއި، ދަރިވަރުންނަށް އެންމެ މަންފާކުރަނިވި ގޮތަށްކަމަށެވެ. 

އޭނާ ވިދާޅުވީ ވިލާ ކޮލެޖްގެ 22 ޕްރޮގްރާމަކުން ކޮލެޖް މެޑަލް ހާސިލްކުރާދަރިވަރުން ދިވެހިރާއްޖޭގެ ނަން މަޝްހޫރު ވިޔަފާރިކުންފުނިތަކާ، ޖަމިއްޔާ ޖަމާއަތްތަކާ، ޕްރޮފެޝަނަލް ބޮޑީސްތަކާ، ފައުންޑޭޝަންތަކުގެ ތެރެއިން 21 ފަރާތަކުން އިންޑަރސްޓްރީ ޕްރައިޒް ހުށަހަޅުއްވައި އެ ކޮލެޖުން ކުރާ މަސައްކަތްތަކުގައި ހިއްސާވަމުން އަންނަ އައުމަކީ ވިލާ ކޮލެޖާއި އިންޑަރސްޓްރީތަކުގެ މުހިއްމު ބައިވެރިންނާއޮތް ގުޅުން ވަރަށް ފުރިހަމައަށް ރަމްޒުކޮށްދޭ ކަމެއް ކަމަށެވެ.

ވިލާ ކޮލެޖްގެ ސްޓޫޑެންޓް އެޗީވްމެންޓް އެވޯޑް ހަފްލާގެ ތެރެއިން... ފޮޓޯ/ ވިލާ ކޮލެޖް

އަދި އެއީ ޕްރޮގްރާމްތައް ފުރިހަމަކޮށްގެން ވަޒީފާގެ ބާޒާރަށް ނިކުންނަ ދަސްވެނިންނަށް ލިބިގެންދާ ވަރަށްބޮޑު އިތުބާރެއްކަން ފާހަގަކުރައްވަމުން ނަޖީބް ވިދާޅުވީ، ވިލާ ކޮލެޖާއެކު ގުޅުން ގާއިމްކޮށް އިންޑަރސްޓްރީގެ ބައިވެރިވުން ހޯދުމަށްޓަކައި މިހާރުވެސް މަސައްކަތްތަކެއް ކުރަމުން ގެންދާކަމަށެވެ.

ވިލާ ކޮލެޖުން ހެދި އެންމެ ފަހުގެ ސާވޭތަކުން ދައްކާގޮތުން އެ ކޮލެޖުގައި ޑިގްރީއަށް އަދި މާސްޓާސް ފެންވަރަށް ކިޔަވާ ދަރިވަރުންގެ ތެރެއިން 90 އިންސައްތައަކީ މިހާރުވެސް ވަޒީފާ އަދާކުރައްވަމުންދާ މީހުންނެވެ. ވަޒީފާގައި ނޫޅޭ މީހުންގެ ތެރެއިން 85 އިންސައްތަ މީހުނަށް އެމީހުންގެ ކިޔެވުން ފުރިހަމަކުރާތާ ގިނަވެގެން އަހަރެއްހާ ދުވަހުގެ ތެރޭގައި ވަޒީފާ ލިބެއެވެ.

ކިޔެވުން ފުރިހަމަކުރި 35 އިންސައްތަ މީހުނަށް މަތީ މަގާމްތަކުގެ ކުރިއެރުން ލިބިފަ ނުވަތަ ކުރިންހުރި މަގާމަށްވުރެރަނގަޅު މަގާމެއް ނުވަތަ ވަޒީފާއެއް ލިބިލައްވާފައިވެއެވެ. އަދި 30 އިންސައްތަ މީހުން ތިބީ ކައިރިމުސްތަގްބަލެއްގައި ވަޒީފާގެކުރިއެރުން ނުވަތަ މިހާރަށްވުރެރަނގަޅު ވަޒީފާއެއް ލިބުމުގެ ޔަގީންކަމުގައެވެ.

ވިލާ ކޮލެޖްގެ ސްޓޫޑެންޓް އެޗީވްމެންޓް އެވޯޑް ހަފްލާގެ ތެރެއިން... ފޮޓޯ/ ވިލާ ކޮލެޖް

ނަޖީބު ވިދާޅުވީ މިއީ ކޮލެޖަށްވެސް އަދި އިންޑަރސްޓްރިއަށްވެސް ވަރަށް މުހިއްމު މައުލޫމާތެއްކަމަށާއި، ވަޒީފާގެ މައިދާނަށް ފައްކާވެފައިތިބި މީހުންތަކެއް ނެރުމަކީ ވިލާ ކޮލެޖުން އެންމެބޮޑު އިސްކަމެއްދޭ ކަމެއް ކަމަށެވެ.

މިގޮތުން ކުރެވެމުންދާ މަސައްކަތްތަކުގެ ތެރެއިން، ވިލާ ކޮލެޖުން ވަނީ އަލަށް ފަށާ ޑިގްރީ ޕްރޮގްރާމްތަކަށް ކޮލެޖްގެ ކޯ މޮޑިއުލްތަކުގެ ގޮތުގައިއަލަށް ތިން މޮޑިއުލެއް ތައާރަފްކުރުމަށް ނިންމާފައެވެ. މީގެ ތެރޭގައި ހިމެނެނީ ސަސްޓެއިނަބިލިޓީ.އޭއައިއިން ޑޭޓާ އެނަލިޓިކްސް، އަދި ޑިޒައިން ތިންކިން އެވެ. މީގެ ތެރެއިން ސަސްޓެއިނަބިލިޓީ އެއީ އޮޑިޓް މޮޑިއުލެއްގެ ގޮތުގައި ވިލާކޮލެޖުން ކިޔަވާކޮންމެ ދަރިވަރަކަށް އެ ސެމިސްޓަރ ލިބޭނޭކަމަށް ނަޖީބް ވިދާޅުވިއެވެ.

ވިލާ ކޮލެޖްގެ ސްޓޫޑެންޓް އެޗީވްމެންޓް އެވޯޑް ހަފްލާގެ ތެރެއިން... ފޮޓޯ/ ވިލާ ކޮލެޖް

އޭނާ ވިދާޅުވީ ވިލާ ކޮލެޖުން މިހާރުވެސް ދަނީ ތަފާތުއެކި ސިނާއަތްތަކުގައި މަސައްކަތްކުރާ އިސްފަރާތްތަކާ ގުޅިގެން އެފަރާތްތަކަށް ބޭނުންވާ ހުނަރުހުރި ދަރިވަރުން ތަކެއް ތަމްރީނުކުރުމަށް މަސައްކަތްތަކެއް ކުރަމުން ކަމަށެވެ. މިގޮތުން ޔުނިވާސަލް ފައުންޑޭޝަނާއި އަދި ސަރުކާރުގެ އެކި ވުޒާރާތައް ގުޅިގެން ރިސޯޓްތަކަށް ބޭނުންވާ ޒުވާނުން ތަމްރީނުކުރުމަށް ކުރިއަށްގެންދާ ޕްރޮގްރާމްތައް ފާހަގަކޮށްލެވެއެވެ.

ވިލާ ކޮލެޖުން މިރޭ ވަނީ، ސްޓޫޑެންޓް އެޗީވްމެންޓް އެވޯޑް ހާސިލްކުރި ދަރިވަރުންނަށް އެކަމުގެ އިނާމާ ލިޔުން ދީފައެވެ. މީގެ ތެރޭގައި ގާސިމް އިބްރާހީމްގެ އެވޯޑް ފޯ އެކްސަލެންސް ހާސިލްކުރެއްވި 23 ފަރާތަކަށާއި، ވިލާކޮލެޖްގެ ގޯލްޑްމެޑަލް އަދި އިންޑަރސްޓްރީ ޕްރައިޒް ހާސިލްކުރި 51 ފަރާތުގެ އިތުރުން، އޭސީސީއޭ ނެޝަނަލް ރެސިޑެންޓް ޕްރައިޒް ހާސިލްކުރި 12 ފަރާތަކަށް ވަނީ އިނާމާ ލިޔުން ދީފައެވެ.