ރުވާންޑާގައި ނުރައްކާތެރި މާބާގް ވައިރަސް ފެތުރުމުގެ ސަބަބުން 6 މީހުން މަރުވެފައިވާކަމަށް އެ ޤައުމުގެ ސިއްހީ ވަޒީރު ހާމަކުރައްވައިފިއެވެ.

ރުވަންޑާގެ ސިއްހީ ވަޒީރުސަބިން ނަސަންޒިމާނާ ވިދާޅުވި ގޮތުގައި މި ބަލީގައި މަރުވި ގިނަ މީހުންނަކީ ހޮސްޕިޓަލުގެ އިންޓެންސިވް ކެއަރ ޔުނިޓުގައި މަސައްކަތްކުރާ ސިއްޙީ މުވައްޒަފުންނެވެ. ހުކުރު ދުވަހު އެގައުމުގައި މި ބަލި ފެތުރޭކަން ކަށަވަރުވުމަށްފަހު މިހާތަނަށް 20 ކޭސް ފާހަގަކުރެވިފައިވާކަން ވެސް އޭނާ ފާހަގަކުރެއްވިއެވެ.

ސިއްހީ ވަޒީރު ވިދާޅުވި ގޮތުގައި މި ބަލި ފެތުރުން ހުއްޓުވުމަށްޓަކައި ބަލި ޖެހިފައިވާ މީހުންނާ ގުޅުން ހުރި މީހުން ދެނެގަތުމާއި، ބަލި ފެތުރޭ މިންވަރު ބެލުމާއި އަދި ޓެސްޓުކުރުން ދަނީ އިތުރުކުރަމުންނެވެ. އެގޮތުން މާބާގް ވައިރަހުގެ އަސަރު ކުރި މީހުންނާ ގުޅުން ހުރި 300 އެއްހާ މީހުން ދެނެގަތުމުގެ މަސައްކަތް މިހާރު ދަނީ ކުރެވެމުންދާކަމަށް އޭނާ ވިދާޅުވިއެވެ.

 އީބޯލާ ވައިރަސް ގެ އާއިލާއަށް ނިސްބަތްވާ މި ވައިރަސް ޖެހުމުގެ ސަބަބުން މަރުވުމުގެ ފުރުސަތު 88 އިންސައްތައަށް އަރައެވެ.

މި ވައިރަސް އިންސާނުންނަށް ޖެހެނީ ވާލުގެ ޒަރީއާއިން ކަމަށްވާއިރު، އޭގެ ފަހުން ބަލި ޖެހިފައިވާ މީހުންގެ ގައިން އެހެން މީހުންނަށް މި ވައިރަސް ފެތުރެއެވެ. 

މި ބައްޔަށް ޖެހޭ މީހުންގެ ކިބައިން ފެންނަ އަލާމާތްތަކުގެ ތެރޭގައި ހުންއައުމާއި، ގައިގައި ރިހުމާއި، ހޮޑުލުން އަދި ބައެއް ހާލަތްތަކުގައި ލޭ މަދުވުން ވުން ވެސް ހިމެނެއެވެ.

ވޯލްޑް ހެލްތު އޯގަނައިޒޭޝަނުން ބުނާ ގޮތުގައި މި ވައިރަހަށް ޚާއްޞަ ފަރުވާއެއް ނުވަތަ ވެކްސިނެއް ނެތް ނަމަވެސް އެކި ބާވަތުގެ ބޭސްތަކާއި އަދި އިމިއުން ތެރަޕީތައް ދަނީ ތަރައްގީ ކުރެވެމުންނެވެ.

މިއީ ރުވާންޑާގައި މާބަރގް ބަލި ފެނުނު ފުރަތަމަ ފަހަރެވެ. އެ ޤައުމާ އަވަށްޓެރި ޓެންޒޭނިއާގައި 2023 ވަނަ އަހަރު މި ބަލި ފެތުރުނު ކަމަށް ރިޕޯޓުކުރެވިފައިވާއިރު، މި ބަލި ފެތުރުމާއި ގުޅިގެން 2017 ވަނަ އަހަރު ޔުގެންޑާގައި 3 މީހުން މަރުވިއެވެ.