ފުޑް ސޭފްޓީ އެންޑް ކޮލިޓީ ބޯޑުގެ ތިން މަގާމަށް މެންބަރުން ހޯދަން ސިއްހީ ވުޒާރާއިން އިއުލާނުކޮށްފިއެވެ.

ސިއްހީ ވުޒާރާއިން ވަކިވަކިން ތިން އިއުލާނެއް ކޮށްފައިވާއިރު، އިއުލާނުކޮށްފައިވާ މަގާމުތަކަކީ ފުޑް ސައިންސްގެ މާހިރަކާއި ހިދުމަތް ލިބިގަންނަ ފަރާތްތައް ތަމްސީލުކުރާ ފަރާތުގެ އިތުރުން ކާބޯތަކެތީގެ ހިދުމަތްދޭ ތަންތަން ތަމްސީލުކުރާ ފަރާތެކެވެ.

5 އަހަރުގެ ދައުރަށް ނަގާ މި މަގާމުތަކުގެ މައިގަނޑު މަސްއޫލިއްޔަތުތަކީ، ކާބޯތަކެތީގެ ފެންވަރާއި ޞިއްޙީ ރައްކާތެރިކަން ކަށަވަރުކުރުމާ ގުޅޭގޮތުންނާއި ކާބޯތަކެއްޗަކީ ޞިއްޙަތަށް ފައިދާހުރި ތަކެތި ކަމުގައި ކަށަވަރުކުރުމާ ގުޅޭގޮތުން އޮތޯރިޓީއަށް ލަފަޔާއި އިރުޝާދާއި ފަންނީ އެހީތެރިކަން ފޯރުކޮށްދިނުމާއި، ޤާނޫނު ތަންފީޛުކުރުމުގައި ދިމާވާ ގޮންޖެހުންތަކަށް ޙައްލު ހޯދުމުގައި އޮތޯރިޓީއަށް ލަފާދިނުމެވެ.

Advertisement

ކާބޯތަކެތީގެ ޚިދުމަތްދޭ ވިޔަފާރިއެއް ނުވަތަ ކާބޯތަކެތީގެ ޚިދުމަތްދޭ އެނޫންވެސް ތަނެއްގައި މަޞްލަޙަތެއް އޮތް ފަރާތެއް ކަމުގައި ނުވުމަކީ މަގާމަށް ކުރިމަތިލާ ފަރާތުގެ ކިބައިން ފުރިހަމަވާން ޖެހޭ ޝަރުތަކަށް ވާއިރު، މަޤާމަށް ޢައްޔަންކުރުމުގައި ޚިދުމަތް ލިބިގަންނަ ފަރާތްތައް ތަމްސީލުކުރާ ޖަމްޢިއްޔާތަކުން ކަނޑައަޅާ ފަރާތަކަށް އިސްކަންދެވޭނެ ކަމަށް ސިއްހީ ވުޒާރާއިން މައުލޫމާތުދެއެވެ.

އެހެންކަމުން، މި މަގާމުތަކަށް ޝައުގުވެރިވާ ފަރާތްތަކުން  މަޤާމަށް އެދި ހުށަހަޅަންޖެހޭ ލިޔެކިއުންތަކާއެކު 10 އޮކްޓޯބަރ 2024 ގެ 13:00 ގެ ކުރިން [email protected] އަށް ހުށަހެޅުއްވުމަށް އެ ވުޒާރާއިން އެދެއެވެ.