ރާއްޖޭގައި ވޭޕް މަނާކޮށްދިނުމަށްއެދި ބެލެނިވެރިންގެ ފަރާތުން ޕެޓިޝަނެއް ތައްޔާރުކުރުމުގެ މަސައްކަތް ފަށައިފިއެވެ.

ވޮއިސްއަށް މައުލޫމާތު ލިބިފައިވާ ގޮތުގައި ސްކޫލްތަކުން ދަނީ، ރައީސުލްޖުމްހޫރިއްޔާ އަށާއި، އެޑިއުކޭޝަން މިނިސްޓްރީގެ އިތުރުން ކަމާބެހޭ އިދާރާތަކަށް ވޭޕް މަނާކޮށްދިނުމަށް އެދި ޕެޓިޝަން ހުށަހެޅުމަށް ތައްޔާރުވަމުންނެވެ. މިފަދަ ޕެޓިޝަނެއް ތައްޔާރުކުރުމުގެ މައިގަނޑު ސަބަބަކީ ވޭޕާއި، ދުންފަތުން ރާއްޖޭގެ މުސްތަގްބަލުގެ ކުރިއަށްއޮތް ޖީލް ސަލާމަތްކޮށްދިނުންކަމަށް ޕެޓިޝަން ތައްޔާރުކުރުމުގައި ހަރަކާތްތެރިވާ ބެލެނިވެރިން ބުނެއެވެ.

ޕެޓިޝަން ހުށަހެޅުމުގެ ފުރުސަތު މާދަމާ މެންދުރު 12 ޖެހުމާ ހަމަޔަށް އެޑިއުކޭޝަނުން ވަނީ ސްކޫލްތަކަށް ދީފައެވެ.

ޕެޓިޝަނުގައި ބުނެފައިވަނީ، ވޭޕް އާއި އީ ސިނގިރޭޓް މުޅި ރާއްޖެއަށް އާއްމުވެފައިވާއިރު، އަދުގެ ޒުވާންޖީލު ރައްކާތެރިކުރުމަށް އަވަސްފިޔަވަޅުތަކެއް އަޅައިދިނުމަށް އެދޭކަމަށެވެ.

ރާއްޖޭގައި ވޭޕް މަނާކުރުމަށް ގޮވާލަމުންދާ އަޑު ގަދަވެފައިވާއިރު، ދުންފަތުގެ ބާވަތްތަކާއި ވޭޕް ރާއްޖެ އެތެރެކުރުން މަނާކުރުމަށް މޯލްޑިވްސް މެޑިކަލް އެސޯސިއޭޝަން (އެމްއެމްއޭ) ގޮވާލަފައެވެ.

އެމްއެމްއޭ އިން ނެރުނު ނޫސްބަޔާނެއްގައި ބުނީ، ގައިންގަޔަށް ނާރާ ބަލިތައް ރާއްޖޭގައި ވަރަށް ގިނަ ކަމަށެވެ. އެފަދަ ބަލިތައް ގިނަވުމުގެ އެެއް ސަބަބަކީ ދުންފަތުގެ އިސްތިއުމާލުކުރުން ގިނަވުން ކަމަށާއި، މި ބަލިތަކުގެ ތެރޭގައި، ނޭވާލާ ނިޒާމުގެ ބަލިތަކާއި، ހިތުގެ ބަލިތަކާއި، ހަކުރުބަލީގެ އިތުރުން ސްޓްރޯކް ވެސް ހިމެނޭ ކަމަށެވެ.

ދުންފަތަކީ އެތައް ހާސް ކެމިކަލް މާއްދާ އާއި 250 ވިހަ އެކުލެވޭ އެއްޗެއް ކަމަށާއި އޭގެ ތެރެއިން 70 މާއްދާއިން ކެންސަރަށް މަގުފަހިވާކަން ދިރާސާތަކުން ދައްކާކަން ފާހަގަކުރަމުން އެމްއެމްއޭ އިން ބުނީ،  ރާއްޖޭގައި ދުންފަތުގެ އިސްތިއުމާލު ކުރުން މަނާކުރުމަކީ އެންމެ ރަނގަޅު ގޮތް ކަމަށެވެ.