ފަރުމަސް އާލާކުރުމުގެ ހުނަރު އުނގަންނައިދިނުމަށްޓަކައި ކުރިއަށްގެންދާ މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމް ގައި ބައިވެރިވުމަށް ހުޅުވާލައިފިއެވެ.

މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އާއި މޯލްޑިވްސް މެރިން ރިސާރޗް އިންސްޓިޓިއުޓުގެ ފަރާތުން ހިންގާ މި ޕްރޮގްރާމްގެ ދެވަނަ ބުރު ކުރިއަށް ގެންދިޔުމަށް ހަމަޖެހިފައިވަނީ 30 އޮކްޓޯބަރު 2024 އިން 12 ނޮވެންބަރު 2024 އަށެވެ.

މިކަމާއި ގުޅޭގޮތުން، ފިޝަރީޒް މިނިސްޓްރީން ކުރި އިއުލާނެއްގައި ބުނީ، 14 ދުވަހުގެ މުއްދަތަށް ހިންގާ މި ތަމްރީނުގައި ބައިވެރިވުމުގެ ފުރުސަތު 15 ފަރާތަކަށް ދިނުމަށް ހަމަޖެހިފައިވާކަމަށެވެ.

މިނިސްޓްރީން ބުނީ، ކޯހުގެ މުއްދަތުގައި ބައިވެރިން ތިބުމަށް ހަމަޖެހިފައިވަނީ ކ. މަނިޔަފުށީގައިކަމަށާއި، ކޯހުގެ ބޭނުމަށް މާލެއާއި މަނިޔަފުއްޓާ ދެމެދު ކުރާ ދަތުރުތަކާއި ބައިވެރިންގެ ހުރުމާއި ކެއުމުގެ އިންތިޒާމް ހަމަޖައްސައިދެވޭނެކަމަށެވެ.

އެހެންކަމުން، މި ތަމްރީނުގައި ބައިވެރިވެލެއްވުމަށް ޝައުގުވެރިވާ ފަރާތްތަކުން 15 އޮކްޓޯބަރ 2024 ވަނަ ދުވަހުގެ 14:00 ގެ ކުރިން ފޯމު ފުރިހަމަ ކުރުމަށްފަހު، އައިޑީކާޑުގެ ކޮޕީއާއި އެކު ހުށަހެޅުމަށް މިނިސްޓްރީން ވަނީ އެދިފައެވެ. މިނިސްޓްރީން ބުނީ،  އީމެއިލް މެދުވެރިކޮށް ފޯމު ހުށަހަޅުއްވާނީ [email protected] އަށް ކަމަށެވެ.

ތަމްރީނު ޕްރޮގްރާމްގައި ބައިވެރިވުމަށް ޝައުގުވެރިކަން 15 ފަރާތަށްވުރެ އިތުރު ފަރާތްތަކުން ހުށަހަޅާފައިވާނަމަ، ބައިވެރިން ހޮވާނީ ފޯމު ހުށަހަޅާ ތަރުތީބުން ކަމަށް މިނިސްޓްރީން މައުލޫމާތުދެއެވެ.