އަނިޔާވެރި އިސްރާއީލުގެ ސިފައިން ވައިގެ މަގުން ލުބުނާނަށް ހަމަލާތައް ދިނުމަށްފަހު، އެއްގަމު މަގުން ލުބުނާނަށް އަރައިގެންފިއެވެ.

ޔަހޫދީ ސިފައިން ބުނި ގޮތުގައި މިއީ، ލުބުނާންގެ ހިޒްބުالله ޖަމާއަތާއި ދެކޮޅަށް ވަކި ސަރަހައްދަކަށް އަމާޒުކޮށްގެން ހިންގާ އޮޕަރޭޝަނެކެވެ. އެމީހުން މިހެން ބުނި ނަމަވެސް، ރަހުމެއް ނެތި ހަމަލާދީ، އާއްމުންގެ މީހުންވެސް ޝަހީދުކުރަމުންދާކަން ފާހަގަކޮށްލަން ޖެހެއެވެ.

ޔަހޫދީ ފައުޖުން ޓޭންކުތަކާއި އެހެނިހެން ހަތިޔާރުތަކާއި އެކު ބޯޑަރު ހުރަސްކޮށްފައިވާކަމަށް ބުނެފައިވާއިރު، ހިޒްބުالله އިން ވަނީ ޔަހޫދީން ލުބުނާނުގައި ހިންގާ ކޮންމެ އޮޕަރޭޝަނަކަށް ވެސް ތައްޔާރުކަމަށް ބުނެފައެވެ.

Advertisement

ހިޒްބުالله ޖަމާއަތުގެ އިސްވެރިއެއްކަމަށްވާ ޝެއިޚް ނައީމް ޤާސިމް ވިދާޅުވީ، އެޖަމާއަތުގައި ތަމްރީނު ލިބިފައިވާ 10،000 ވުރެ ގިނަ މުޖާހިދުން އެބަ ތިބި ކަމަށެވެ.

އިސްރާއީލުގެ ސިފައިން ލުބުނާނަށް އަރައިގަތުމާއިއެކު، އިސްރާއިލާއި ލުބުނާނާއި ދެމެދުގައިވާ ބޯޑަރުގެ ކައިރީގައި ތިބި ލުބުނާނުގެ ސިފައިން ވަނީ 5 ކިލޯމީޓަރު އުތުރަށް ބަދަލުކޮށްފައެވެ.

ޔަހޫދީ ފައުޖުން ލުބުނާނަށް އަރައިގަނެ، ލުބުނާނުގެ ދެކުނުގައިވާ އައިތާ އައް-ޝަޢާބް ސަރަހައްދުގެ އިތުރުން، ސައިދާ ސިޓީއާ ކައިރީގައި އޮންނަ ފަލަސްތީނުގެ ރެފިއުޖީ ކޭމްޕެއްގައި ހުރި އިމާރާތަކަށްވެސް ވަނީ ހަމަލާދީފައެވެ.

ލުބުނާނުގެ އޮފިޝަލުން ވިދާޅުވީ، އިސްރާއީލުން ދެމުންގެންދާ ލާއިންސާނީ ހަމަލާތަކުގެ ސަބަބުން ވޭތުވެދިޔަ ދެ ހަފްތާގެ ތެރޭގައި 1،000 އަށްވުރެ ގިނަ މީހުން ޝަހީދުވެފައިވާކަމަށާއި،އެއް މިލިއަނަށްވުރެ ގިނަ މީހުން ގެދޮރު ދޫކޮށް ދާންޖެހިފައިވާކަމަށް ލަފާ ކުރާ ކަމަށެވެ.