އަވައްޓެރި އިންޑިއާގައި އުފައްދާ 48 ބޭހަކަށް ސަމާލުވުމަށް، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ސަމާލުވުމަށް އިލްތިމާސްކޮށްފިއެވެ.

އެމްއެފްޑީއޭއިން މިއަދު އާއްމުކުރި އިއުލާނެއްގައި ވަނީ ކުޑަކުދިންނަށް އާއްމުކޮށް ދެމުން އަންނަ ބޭހެއްކަމަށްވާ ޕެރެސެޓްމޯލް ހިމެނޭހެން އިންޑިއާއަށް ނިސްބަތްވާ ބައެއް ކުންފުނިތަކުން އުފައްދާ 48 ބޭހަކަށް ސަމާލުވުމަށް އެދިފައެވެ. އެމްއެފްޑީއޭއިން ބުނީ، އިންޑިއާގެ އެކި ކުންފުނިތަކުން އުފައްދާފައިވާ ބައެއް ބޭސްތަކުގައި ކޮލިޓީގެ މައްސަލަަތައް ފާހަގަކުރެވިފައިވާތީ، އިންޑިއާގެ ބޭސް ރެގިއުލޭޓްކުރާ މައި އިދާރާ CDSCO އިން ސަމާލުކަމަށް ގެނެސްފައިވާކަމަށެވެ. 

އެމްއެފްޑީއޭއިން ބުނީ އިންޑިއާގެ ކަމާބެހޭ އިދާރާގެ ސަމާލުކަމަށް އެކަން އައުމާ ގުޅިގެން ރާއްޖޭގެ ބާޒާރުގައި އެ ބޭސްތައް ހުރިތޯ ބެލުމަށް ފާމަސީތައް ބަލާފައިވާކަމަށެވެ. މިހާތަނަށް ބެލި ބެލުމުން އެ ލިސްޓްގެ 44 ވަނައިގައިވާ ބޭހަކީ އެމްއެފްޑީއޭގެ އެޕްރޫވްޑް ލިސްޓްގައި 2017 ވަނަ އަހަރު ހިމަނާފައިވާ ބޭހެއް ނަމަވެސް، 2018 ވަނަ އަހަރުން ފެށިގެން މި ބޭހުގެ އެއްވެސް ބެޗެއް ރާއްޖެ އެތެރެކޮށްފައި ނުވާކަން ޔަގީން ކުރެވިފައިވާކަމަށް އެމްއެފްޑިއޭއިން ބުންޏެވެ.

އެއޮތޯރިޓީން ބުނީ CDSCO ގެ ލިސްޓްގައިވާ އެއްވެސް ބޭހެއް ރާއްޖެއަށް އިމްޕޯޓްކޮށްފައި ނުވާކަން ޔަގީންކުރެވިފައިވާކަމަށެވެ. 

ނަމަވެސް އިންޑިއާއަކީ ވަރަށް ގިނަ ދިވެހިން ބޭސްފަރުވާއަށް ގޮސް އުޅޭ ޤައުމެއްކަމުން ބައެއް ފަހަރަށް އަމިއްލައަށް ބޭސް ގަނެ، އެތެރެކުރާތީވެ، އެކަމަށް ސަމާލުވުމަށް އެމްއެފްޑީއޭއިން ވަނީ އިލްތިމާސްކޮށްފައެވެ.

އަދި މިކަމަށްރައްކާތެރިވުމުގެ ގޮތުން ރާއްޖެއަށް ބޭސް އިމްޕޯޓްކުރާ ޕޯޓްތަކުގެ އިންސްޕެކްޝަން އިތުރަށް ވަރުގަދަކޮށް، އެފަދަ ބޭސްތައް އެތެރެވިޔަ ނުދިނުމަށް ކުރަންޖެހޭ މަސައްކަތްތައް ކުރަމުންގެންދާނެކަމުގެ ޔަގީންކަން އަރުވާކަމަށްވެސް އެމްއެފްޑީއޭއިން ބުންޏެވެ.