އިންޓަނޭޝަނަލް ކޯޓް އޮފް އާބިޓްރޭޝަން (އައިސީޖޭ) އަށް އިޒްރާއީލާ ދެކޮޅަށް ދެކުނު އެފްރިކާއިން ހުށަހެޅި މައްސަލައިގެ ތެރެއަށް ދިވެހިރާއްޖެއިން ތަދައްޚުލްވާން ހުށަހަޅައިފިއެވެ.

މިކަމާ ގުޅޭގޮތުން ބަންޑާރަނައިބުގެ އޮފީހުންނެރުނު ބަޔާނެއްގައި ބުނެފައިވަނީ، އިންޓަރނޭޝަނަލް ކޯޓް އޮފް ޖަސްޓިސްގައި ކުރިއަށްދާ ދެކުނު އެފްރިކާ، އިސްރާއީލު މައްސަލައަށް ދިވެހިރާއްޖެއިން ތަދައްޚުލުވުމަށް ހުށަހަޅާފައިވާކަމަށެވެ. މި މައްސަލާގައި ރާއްޖޭގެ ފަރާތުން ތަމްސީލްކުރާނީ ބަންޑާރަނައިބު އަލްއުސްތާޛު އަޙްމަދު އުޝާމް އެވެ.

މި މައްސަލައަކީ ދެކުނު އެފްރިކާގެ ފަރާތުން މިދިޔަ އަހަރުގެ ޑިސެމްބަރުމަހުގެ 29 ވަނަ ދުވަހު އައި.ސީ.ޖޭ. އަށް ހުށަހެޅި މައްސަލައެކެވެ. މައްސަލައިގައި، ދެކުނު އެފްރިކާއިން ހުށަހަޅާފައިވަނީ، އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ޣައްޒާގައި ހިންގަމުންދާ ނިރުބަވެރި އަމަލުތަކަކީ  1948 ވަނަ އަހަރުގެ ކޮންވެންޝަން އޮން ދަ ޕްރިވެންޝަން އެންޑް ޕަނިޝްމަންޓް އޮފް ދަ ކްރައިމް އޮފް ޖެނޮސައިޑް (ޖެނޮސައިޑް ކޮންވެންޝަން) އާ ޚިލާފު ޢަމަލުތަކެއްކަމަށެވެ.

Advertisement

ދިވެހިރާއްޖެއިން މިއަދު ހުށަހެޅި އިންޓަރވެންޝަން ބިނާކޮށްފައިވަނީ ޖެނޮސައިޑް ކޮންވެންޝަންގެ ދަށުން "އިންސައިޓްމަންޓް ޓު ކޮމިޓް ޖެނޮސައިޑް" އަދި "ޑިއުޓީ ޓު ޕަނިޝް ދަ އިންސައިޓްމަންޓް އޮފް ޖެނޮސައިޑް" މާނަކޮށްފައިވާ ގޮތާ ގުޅޭގޮތުންކަމަށް ބަންޑާރަ ނައިބުގެ އޮފީހުން ބުންޏެވެ.

އިސްރާއީލުން ހިފާފައިވާ  ފަލަސްތީނުގެ ބިންތަކުގައި ހިންގަމުންދާ ޢަމަލުތައް ކުށްވެރިކޮށް، އެ ޢަމަލުތަކަކީ ނިރުބަވެރި އަމަލުތަކެއްކަމަށް ދިވެހި ސަރުކާރުން ދަނީ ބައިނަލްއަޤްވާމީ މައިދާނުގައި އަޑުއުފުލަމުންނެވެ. މިގޮތުން އ.ދ. ގެ ޢާންމު މަޖިލީހުގައި ނިމިގެންދިޔަ 79 ވަނަ ސެޝަންގެ ޢާންމު ބަހުސްގައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ، ޣައްޒާގައި އިޒްރާއީލުން ހިންގަމުންދާ ނިރުބަވެރި ޢަމަލުތަކަށް އިޒްރާއީލުން ޖަވާބުދާރީ ކުރުވެން ޖެހޭނެކަމަށް ވިދާޅުވެ ވާހަކަފުޅު ދައްކަވާފައެވެ.

އިޒްރާއީލާ ދެކޮޅަށް ދެކުނު އެފްރިކާއިން ބައިނަލްއަޤްވާމީ ކޯޓަށް ހުށަހެޅި އެ މައްސަލައިގެ ތެރެއަށް ޔޫރަޕްގެ ބައެއް ޤައުމުތަކުންވެސް ވަނީ ތަދައްޚުލްވެފައެވެ.