ދިވެހިރާއްޖޭގެ ތަރައްޤީގެ ފުރިހަމަ ބައިވެރިއެއްގެ ގޮތުގައި ޗައިނާ ދެމި އޮންނާނެ ކަމުގެ ޔަގީންކަން އެބައޮތްކަމަށް ކުރީގެ ހާރިޖީވަޒީރު، ޢަބްދުﷲ ޝާހިދު ވިދާޅުވެއްޖެއެވެ.
ޝާހިދު މިހެން ވިދާޅުވެފައިވަނީ، ޗައިނާގެ 75ވަނަ ޤައުމީ ދުވަހުގެ މުނާސަބަތުގައި އެޤައުމުގެ ރައީސް ޝީ ޖިންގޕިންގ އަށް ތަޙުނިޔާ ކިޔުމަށް އެކްސްގައި ކުރެއްވި ޕޯސްޓެއްގައެވެ. ރާއްޖޭގެ ހާރިޖީ ހިދުމަތުގެ އެންމެ ތަޖުރިބާކާރު އެއް ބޭފުޅާގެ ގޮތުގައި ފާހަގަކުރެވޭ، ޝާހިދު ވިދާޅުވީ، ރާއްޖެއާ ޗައިނާ އާ ދެމެދު ދެމިގެންދާ ގުޅުން ބިނާވެފައިވަނީ، އެއްބަޔަކު އަނެއްބަޔަކަށް ކުރާ އިހުތިރާމުގެ މައްޗަށްކަމަށެވެ. މީގެ ތެރޭގައި ދެޤައުމުގެ ސިޔާސަތުތައް އެއްޤައުމު އަނެއް ޤައުމުން ބަލައިގަންނަމުންދާ ދިއުން ޝާހިދު ފާހަގަކުރެއްވިއެވެ.
ޝާހިދު ވިދާޅުވީ ކުރިއަށްއޮތް ތަނުގައިވެސް ރާއްޖޭގެ ތަރައްޤީގެ އެކި ކަންކަމުގައި ޗައިނާގެ ފަރާތުން ފުރިހަމަ އެއްބާރުލުން ލިބެމުންދާނެކަމުގެ ޔަގީންކަން އެބައޮތްކަމަށެވެ.
ދިވެހިރާއްޖޭގެ ތަރައްޤީގައި ޗައިނާއަކީ މުހިއްމު ބައިވެރިއެކެވެ. ރާއްޖޭގައި މިހާތަނަށް ހިންގުނު އިގްތިސާދީ އަދި އުމްރާނީ ތަރައްޤީގައި ޗައިނާގެ ބައިވެރިވުން ވަރަށްބޮޑެވެ.
ޗައިނާގެ ހިއްސާއާ އެކު ރާއްޖޭގައި ކުރިއަށްގެންދިޔަ ފާހަގަކޮށްލެވޭ މަޝްރޫޢުތަކުގެ ތެރޭގައި، ސިނަމާލެ ބްރިޖް މަޝްރޫޢު އާއި، ހައްދުންމަތި ލިންކް ރޯޑް މަސައްކަތުގެ އިތުރުން، ހުޅުމާލޭގައި ކުރިއަށްގެންދިޔަ ބޯހިޔާވަހިކަމުގެ މަޝްރޫޢުތައް ފާހަގަކޮށްލެވެއެވެ.
ރާއްޖެ އާއި ޗައިނާ އާ ދެޤައުމުގެ ދެމެދުގައި ސިޔާސީގުޅުން ގާއިމްކޮށްފައިވަނީ 1972 ވަނަ އަހަރެވެ.
Advertisement
This content is created and paid for by advertisers and does not involve Voice Journalists
