ބޭރު ފައިސާގެ ދަތިކަން ޙައްލުކުރުމަށް ސަރުކާރުން އަޅާފައިވަނީ މުހިންމު ފިޔަވަޅުތަކެއް ނަމަވެސް، އޭގެ ނޭދެވޭ އަސަރު ކުރާނެ ކަމަށް ކުރީގެ އިކޮނަމިކް މިނިސްޓަރ އަދި އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާޢީލް ވިދާޅުވެއްޖެއެވެ.
ފައްޔާޒު މިއަދު އެކްސްގައި ކުރެއްވި ޕޯސްޓެއްގައި ވަނީ، ފަތުރުވެރިކަމުގެ ދާއިރާއިން ލިބޭ އާމްދަނީ ރާއްޖޭގެ ބޭންކުތަކަށް ޖަމާކުރުމަށާއި، ކޮންމެ ފަތުރުވެރިއެއްގެ އަތުން ވަކި އަދަދެއްގެ ޑޮލަރު ސަރެންޑަރ ކުރުމަށް ސަރުކާރުން ނިންމާފައިވާ ނިންމުމަކީ ފޮރިން ކަރަންސީގެ ދަތިކަން ޙައްލުކުރުމަށް މިހާތަނަށް އެޅި އެންމެ މުހިންމު ފިޔަވަޅުކަން ފާހަގަކުރެއްވަާފައެވެ.
އަދި އެކަމުގެ ސަބަބުން ބައެއް ޕްރެޝަރުތަކަށް ލުޔެއް ލިބޭނެ ކަމަށް ވިދާޅުވިއެވެ.
އެހެންނަމަވެސް އެކަން ތަންފީޒުކޮށްފައިވާ ގޮތަކީ މައްސަލަ ބޮޑު ވާނެ ގޮތެއް ކަމަށް ފައްޔާޒު ވިދާޅުވިއެވެ.
ފައްޔާޒު ވިދާޅުވިގޮތުގައި، 2022 ވަނަ އަހަރު ވަޒީރުންގެ މަޖިލީހުން ފާސްކޮށްފައިވަނީ، ލިބޭ އާމްދަނީގެ އިންސައްތައެއް ދޫކޮށްލަން ޖެހޭ ގޮތަށް ކަމަށާ، ބޭރު ފައިސާ ހޯދާ ފަރާތްތަކަށް އެ ފަރާތްތަކުގެ ވަކި ބޭނުންތަކެއް ފުއްދައިދޭނެކަމުގެ ވަކި ގެރެންޓީތަކެއް ދީފައިވާނެ ކަމަށެވެ.
ނަމަވެސް، ހިތާމައަކީ އެ ނިންމުން އެމްއެމްއޭއަށް ތަންފީޒު ނުކުރެވުނީ ޓީޖީއެސްޓީ ރޭޓް ބޮޑުކުރުމާއި ކޮވިޑް-19 އިން އަރައިގަތުން ފަދަ ތަފާތު ސަބަބުތަކާ ހުރެ
ފައްޔާޒު އިސްމާޢީލް
މީގެ އިތުރުން، ފައްޔާޒު ވިދާޅުވީ މި ފިޔަވަޅު އެކަނި ޑޮލަރުގެ މާރުކޭޓުގައި ހުރި މައްސަލަތައް ޙައްލު ނުވާނެކަމަށެވެ. ސަރުކާރުގެ ޚަރަދުތައް ކުޑަކުރުމާއި، ފައިސާ ބަދަލުކުރާ މަރުކަޒުތައް މޮނިޓަރ ކުރުމުގެ އިތުރުން އެހެނިހެން ފިޔަވަޅުތައް އަޅައި މެކްރޯ-އިކޮނޮމިކް ބެލެންސް އަލުން އިއާދަކުރުމުގެ މަސައްކަތް ކުރިއަށް ގެންދަން ޖެހޭ ކަމަށް އޭނާ ފާހަގަކުރެއްވިއެވެ.
ފައްޔާޒު އިތުރަށް ވިދާޅުވީ، މިހާރު ނިންމާފައިވާ ގޮތަށް ކޮންމެ ފަތުރުވެރިއެއްގެ އަތުން ވަކި އަދަދެއްގެ ޑޮލަރު ނެގުމުގެ ބަދަލުގައި، ލިބޭ ބޭރު ފައިސާގެ އިންސައްތައަކުން ނެގުމަށް ބަދަލުކުރަން ޖެހޭކަމަށެވެ. މިހާރު ނިންމާފައިވާ ގޮތުން ގެސްޓްހައުސްތަކާއި ދަށް ފަންތީގެ ރިސޯޓުތަކަށް ނޭދެވޭ އަސަރުކުރާނެ ކަމަށާއި، ސަފާރީ އުޅަނދުތަކާއި މެދު ފަންތީގެ ރިސޯޓުތަކަށްވެ ސް ބޮޑެތި ގެއްލުންތަކެއް ލިބިދާނެކަމަށް އެމަނިކުފާނު ވިދާޅުވިއެވެ
"މި ނިންމުމުގެ ސަބަބުން ކުދި އަދި މެދު ފަންތީގެ ވިޔަފާރިތަކަށް ނޭދެވޭ އަސަރުކޮށް، އެ ތަންތަނުގެ ދެމިހުރުމަށް ނުރައްކާވެދާނެ. އަދި މުސްތަޤުބަލުގައި ބޭރުގެ އިންވެސްޓްމަންޓްތައް ރާއްޖެއަށް އައުމަށްވެސް ހުރަސްތަކެއް ކުރިމަތިވެދާނެ،" ފައްޔާޒު ވިދާޅުވިއެވެ.
މި މައްސަލައިގައި ސަރުކާރާއި އެމްއެމްއޭއިން ވީހާވެސް އަވަހަކަށް ހުރިހާ ސްޓޭކްހޯލްޑަރުންނާއެކު ފުޅާ ދާއިރާއެއްގައި މަޝްވަރާކޮށް، މިހާރު ހަދާފައިވާ ގަވާއިދު މުރާޖާކޮށް، ކުރިއަށް ދާނެ ގޮތަކާމެދު އެއްވިސްނުމަކަށް އާދެވޭތޯ މަސައްކަތްކުރުމަށް ފައްޔާޒު ގޮވާލެއްވިއެވެ.
Advertisement
This content is created and paid for by advertisers and does not involve Voice Journalists
