ސިޔާސީޕާޓީގެ ދަފްތަރުން ވަކިވާން ބޭނުންނަމަ، މާދަމައިން ފެށިގެން އެކަންކުރެވޭނީ އޮންލައިން ޕޯޓަލް މެދުވެރިކޮށްކަމަށް އިލެކްޝަން ކޮމިޝަނުން ހަމަޖައްސައިފިއެވެ.
އިލެކްޝަން ކޮމިޝަނުން މިހާރު ވަނީ ޕާޓީން ވަކިވުމުގައި މިހާތަނަށް އަމަލުކުރަމުން އައި އުސޫލް ބަދަލުކުރުމަށް ނިންމައި އެކަން އާއްމުވެސް ކޮށްފައެވެ. އެގޮތުން މާދަމައިން ފެށިގެން ސިޔާސީ ޕާޓީން ވަކިވެވޭނީ އެކަމަށް ހާއްސަކޮށްފައިވާ އޮންލައިން ޕޯޓަލް މެދުވެރިކޮށްކަމަށް އީސީން ބުންޏެވެ.
ޕާޓީން ވަކިވުމަށް އެދޭ ފަރާތްތަކުން އެކަމަށް އެދި ހުށަހަޅަން ޖެހެނީ my.elections.gov.mv ޕޯޓަލް މެދުވެރިކޮށެވެ. އިލެކްޝަނުން ފަހުން އާއްމުކުރި އުސޫލުގައި ވަނީ ޕާޓީން ވަކިވުމުގެ ޕްރޮސެސް ފަސޭހަކޮށްދީފައެވެ. އައު އުސޫލުގައި ބުނާގޮތުން ޕާޓީގެ މެމްބަރުކަމުން ވަކިވާން އެދޭތާ 14 ދުވަހުގެ ތެރޭގައި އެމީހަކު ޕާޓީގެ ދަފްތަރުން ވަކިކޮށްދޭން ޖެހެއެވެ.
ޕާޓީން ވަކިވާން އެދޭތާ 14 ދުވަހުގެ ތެރޭގައި ވަކިކޮށް ނުދީފިނަމަ އިލެކްޝަނުގެ ނިޒާމުގެ ތެރެއިން އެމީހަކު ޕާޓީން ވަކިކުރެވޭކަން ފާހަގަކޮށްލެވެއެވެ.
އިލެކްޝަނަށް ހުށަހެޅޭ ޝަކުވާތަކުގެ ތެރެއިން ނޭނގި ނުވަތަ އޮޅުވާލައިގެން ޕާޓީއަށް ވައްދާ މައްސަލައަކީ އެންމެބޮޑު އެއް މައްސަލައެވެ.
Advertisement
This content is created and paid for by advertisers and does not involve Voice Journalists
