އެމްޑީޕީއަކީ މާލީގޮތުން ތަނަވަސް ބާރުވެރި ޕާޓީއަކަށް ހެދުމަށް ވިޔަފާރިއެއް ކުރުމަށް ނިންމާފައިވާކަމަށް އެ ޕާޓީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.

އެމްޑީޕީން މިރޭ ބޭއްވި އެޕާޓީގެ ޤައުމީ މަޖިލީހުގައި ވާހަކަދައްކަވަމުން ފައްޔާޒް ވިދާޅުވީ، ސިޔާސީ ޕާޓީތަކުގެ ޤާނޫނުގެ ފަސްވަނަ މާއްދާގެ ދަށުން ޕާޓީތަކަށް ވިޔަފާރިކުރުމުގެ ބާރުލިބިފައިވާކަމަށާއި، މިއީ މިއަދު ކޮންމެހެންވެސް ކުރަން ޖެހިފައިވާކަމެއްކަމަށެވެ. ފައްޔާޒް ވިދާޅުވީ ސިޔާސީ ޕާޓީ ހިންގުމަކީ ފައިސާ ބޭނުންވާ ކަމެއްކަމަށް ވީހިނދު، އެމްޑީޕީ އުފެދުނުފަހުން މިއަދާހަމަޔަށް އާއިރު މާލީ ތަނަވަސްކަމާއި، މިނިވަންކަން ހާސިލްވެފައި ނުވާކަމަށެވެ.

މިގޮތުން އެމްޑީޕީއަށް 19 އަހަރު ވީއިރު މާލީގޮތުން ލިބުނު ބާރުވެރިކަމެއް ނެތްކަން ފާހަގަކުރައްވަމުން ފައްޔާޒް ވިދާޅުވީ، ވަރަށް އަވަހަށް ގެދޮރުގެ ވިޔަފާރީގެ ތެރެއަށް ވަދެ އެކަން ފަށަންޖެހޭކަން ފައްޔާޒް ވަނީ ވިދާޅުވެފައެވެ.

ދައުލަތުގެ ބައިތުލްމާލުން ލިބޭ ފައިސާއިން ޕާޓީ ނުހިންގޭކަން ފާހަގަކުރައްވަމުން ފައްޔާޒް ވިދާޅުވީ، ޕާޓީ ހަރުދަނާގޮތެއްގައި ކުރިއަށް ގެންދިއުމަށް ބައިވަރު ފައިސާ ބޭނުންވާކަމަށެވެ. 

އެމްޑީޕީ ޤައުމީ މަޖިލީހުގެ ތެރެއިން...

އެމްޑީޕީން މިރޭ ނިންމާފައިވަނީ ޕާޓީން ވިޔަފާރި ކުރެވޭނެ ގޮތްތަކަކީ ކޮބައިތޯ ބަލައި، ވިޔަފާރީގެމޮޑެލް އާއި އެނޫންވެސް އުސޫލްތައް އެކުލަވާލުމަށް ޤައުމީ މަޖިލީހުގެ ޖަލްސާއެއް ބޭއްވުމަށް ނިންމާފައެވެ. ސިޔާސީޕާޓީތަކުގެ ޤާނޫނުގެ 34 ވަނަ މާއްދާގައި ބުނެފައިވަނީ، ޕާޓީތައް ހިންގުމަށް ބޭނުންވާ ފައިސާ އާއި ތަކެތި ހޯދުމަށް ވިޔަފާރި ކުރެވިދާނެ ކަމަށެވެ. އެގޮތުން ފައިސާ ހޯދަން ހިންގާ ހަރަކާތްތަކުންނާއި، ވިޔަފާރީގެ މުއާމަލާތްތަކުން ފައިސާ ހޯދޭނޭކަމަށް ބަޔާންކޮށްފައި ވެއެވެ. 

އެމްޑީޕީން މިރޭ ވަނީ މީހުން ބިނާކުރުމަށް ޕާޓީގެ ފަރާތުން އެކަޑަމީއެއްވެސް އުފެއްދުމަށް ނިންމާފައެވެ.

ދިވެހިރައްޔިތުންގެ ޑިމޮކްރަޓިކް ޕާޓީ، އެމްޑީޕީއަކީ ރާއްޖޭގައި އެންމެފުރަތަމަ އުފެދުނު ސިޔާސީޕާޓީއެވެ. އެމްޑީޕީ އުފައްދާފައިވަނީ 2005 ވަނަ އަހަރު އަވައްޓެރި ސްރީލަންކާގައެވެ.