ބޭރުފައިސާ ގަނެ ވިއްކާ ވިޔަފާރިތަކުން ލައިސަންސަށް އެދި ހުށަހެޅުމުގެ ފުރުސަތު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ހުޅުވާލައިފި އެވެ.

އެމްއެމްއޭއިން ކުރި އިއުލާނެއްގައި ބުނީ، ބޭރު ފައިސާގެ ބާޒާރުގެ ގާނޫނ އޮނިގަނޑު ހަރުދަނާކުރުމާއި އަދި އެދާއިރާގެ ހަމަޖެހުން ދެމެހެއްޓުމަށްޓަކައި އެ އޮތޯރިޓީން ކުރަމުންދާ މަސައްކަތްތަކުގެ ތެރެއިން " މަނީ ޗޭންޖިންގ ވިޔަފާރިއާ ބެހޭ ގަވާއިދު" ގެޒެޓްކުރެވި 1 އޮކްޓޫބަރު 2024 ވަނަ ދުވަހުން ފެށިގެން އަމަލުކުރަން ފަށާފައިވާކަމަށެވެ.

މި ގަވާއިދަށް އަމަލުކުރަން ފެށުމާއެކު، "މަނީ ޗޭންޖަރ ކަމުގެ ލައިސަންސް ލިބިގެން ބޭރު ފައިސާ ގަނެ ވިއްކާ ފަރާތްތަކުން ކަންތައް ކުރަންވީ ޤަވާޢިދު (1987)" އުވިފައިވާކަމަށް އެމްއެމްއޭއިން ވަނީ ހާމަކޮށްފައެވެ.

Advertisement

މިހާރު އަމަލުކުރަން ފަށާފައިވާ ގަވާއިދުގެ ދަށުން އެމްއެމްއޭއިން ދޫކުރަނީ ދެ ބާވަތެއްގެ ލައިސަންސްއެކެވެ. އެއީ:

1) ޓިއަރ 1 މަނީ ޗޭންޖިންގ ލައިސަންސް – މި ލައިސަންސް ދޫކުރެވޭނީ، ކުންފުނީ ގެ ޤާނޫނު ގެ ދަށުން، ބޭރު ފައިސާ ގަތުމާއި ވިއްކުމުގެ ވިޔަފާރިކުރުމަށް އުފައްދާފައިވާ ކުންފުނިތަކަށެވެ.

2)  ޓިއަރ 2 މަނީ ޗޭންޖިންގ ލައިސަންސް – މި ލައިސަންސް ދޫކުރެވޭނީ، ދިވެހިރާއްޖޭގެ ޓޫރިޒަމާބެހޭ ޤާނޫނުގެ ދަށުން ޓޫރިސްޓް ރިޒޯޓް ހިންގަން ހުއްދަ ނުވަތަ ލައިސަންސް ލިބިފައިވާ ކުންފުނިތަކަށެވެ.

އެމްއެމްއޭއިން ބުނީ، މި ގަވާއިދަށް ޢަމަލުކުރަން ފަށާއިރު، އޮތޯރިޓީން ދޫކުރާ ލައިސަންސެއް ލިބިގެން ދިވެހިރާއްޖޭގައި މަނީ ޗޭންޖިންގ ވިޔަފާރި ކުރާ ފަރާތްތަކުން، މި ގަވާއިދުގެ ދަށުން ލައިސަންސަށް އެދި ހުށަހަޅާ ހުށަހެޅުމަކަށް ލައިސަންސް ދިނުމާމެދު ވަކިގޮތެއް ނިންމާ އަންގަންދެން، އެ ފަރާތްތަކަށް ދޫކޮށްފައިވާ ލައިސަންސްގެ ދަށުން ބޭރު ފައިސާ ގަނެ ވިއްކުމުގެ ވިޔަފާރި ކުރިއަށް ގެންދެވިދާނެކަމަށެވެ.

އެހެންނަމަވެސް، އެފަދަ ފަރާތްތަކުން މި ގަވާއިދަށް ޢަމަލުކުރަން ފަށާ ތާރީޚުން ފެށިގެން 2 މަސްދުވަހުގެ ތެރޭގައ،ި ޓިއަރ 1 ނުވަތަ ޓިއަރ 2 ލައިސަންސަށް އެދި ހުށަހަޅާފައިނުވާނަމަ، އެ ފަރާތަށް ދޫކޮށްފައިވާ ލައިސަންސް، މި މުއްދަތު ހަމަވާ ތާރީޚުގައި ބާޠިލުވާނެކަމަށާއި، ލައިސަންސް އާ ކުރުމަށް ހުށަހަޅާނީ changers-money/mv.gov.mma.extranet://https  މެދުވެރިކޮށް ލައިސަންސަށް އެދޭ ފޯމުންކަމަށް އެމްއެމްއޭއިން ހާމަކުރެއެވެ.

އެމްއެމްއޭއިން ބުނީ، މި ގަވާއިދާ ގުޅިގެން އަލަށް ލައިސަންސް ދޫކުރުމަށް ހަމަޖެހިފައިވަނީ ޖުމުލަ 50 ފަރާތަށްވުރެ އިތުރުނުވާނެ ގޮތަށްކަމަށާއި، އަލަށް ލައިސަންސަށް އެދޭ ފަރާތްތައް މިއަދަދަށްވުރެ އިތުރުވާނަމަ، ލައިސަންސް ދޭނެ ފަރާތްތައް ކަނޑައަޅާނީ ޝަރުތު ހަމަވާ ފަރާތްތަކުގެ މެދުގައި ނެގޭ ގުރުއަތަކުންކަމަށެވެ.

އެއާއިއެކު، އެމްއެމްއޭއިން ވަނީ 30 ނޮވެންމަރު 2024 އާއި ހަމައަށް އަލަށް ލައިސަންސަށް އެދި ހުށަހެޅުމަށް ހުޅުވާލާފައެވެ.