ބޭންކް އޮފް މޯލްޑިވްސް (ބީއެމްއެލް) ގެ ބޭންކް ފަންޑުން މިއަހަރު އެހީތެރިވާނެ ޖަމިއްޔާތައް ކަނޑައަޅައިފިއެވެ.

ބީއެމްއެލުން ބުނީ، މިއީ ޖަމިއްޔާތައް ބާރުވެރިކޮށް ދެމެހެއްޓެނެވި ތަރައްގީއަށް ތައާރަފްކުރި ޕްރޮގްރާމެއްކަމަށެވެ. އެގޮތުން، ބީއެމްއެލުން ވަނީ މިއަހަރު ފަންޑިން ފޯރުކޮށްދޭނެ 5 ޖަމިއްޔާއެއް ކަނޑައަޅާފައެވެ. އެ ޖަމިއްޔާތަކަކީ:

1) މުރަކަ ފާމް: ކަނޑުގެ ދިރުންތައް ރައްކާތެރިކޮށް ދެމެހެއްޓެނިވި ގޮތެއްގައި ބެލެހެއްޓުމަށް ބ. ދަރަވަންދޫގައި މުރަކަ އާލާކުރުމުގެ މަޝްރޫޢު

Advertisement

2) ޗިލްޑްރަން އޮފް މޯލްޑިވްސް: ތިމާވެއްޓާމެދު ޝައުގުވެރިކަން އުފައްދައި، ހޭލުންތެރިކޮށް، އިލްމީ މައުލޫމާތު ފޯރުކޮށްދިނުމަށް ވިލިމާލޭގައި ލައިބްރަރީއެއް ގާއިމްކުރުން

3) ދިއްގަރު އެކުވެރި ޒުވާނުންގެ ގުޅުން: ކާބޯތަކެތީގެ ރައްކާތެރިކަމާއި ދެމެހެއްޓެނިވި ދަނޑުވެރިކަމުގެ އާދަތަކާއެކު ހިންގާ ދަނޑުވެރިކަމުގެ މަޝްރޫޢު

4) ވޭމަންޑޫ ޒުވާނުންގެ ގުޅުން: ހަމަހަމަ ފުރުސަތު ހޯދައިދިނުމަށް ތ. ވޭމަންޑޫ ސްކޫލުގައި ހާއްސަ އެހީއަށް ބޭނުންވާ ދަރިވަރުންނަށް ސެންސަރީ އަދި ވޮކޭޝަނަލް ތަމްރީނުތަކަށް ޓްރެއިނިންގ ރޫމެއް ޤާއިމްކުރުން

5) ޔުނިޓީ ސްޕޯޓްސް އެކަޑަމީ: ޓެކްނޮލޮޖީ އަދި ކުޅިވަރުގެ ޒަރިއްޔާއިން ޒުވާނުން ބާރުވެރިކުރުމަށް ށ. ފުނަދޫ ސްކޫލުގައި މީޑިއާ އަދި ކުޅިވަރު ލެބްތައް ތަރައްގީކުރުން

މިކަމާއި ގުޅިގެން ބީއެމްއެލްގެ ޑެޕިއުޓީ ސީއީއޯ އަދި އިންޗާރޖް އޮފް ދަ ބޭންކް ޢާއިޝަތު ނޫރައްދީން ވިދާޅުވީ ބޭންކް ފަންޑަކީ ރާއްޖޭގެ އެކި ކަންކޮޅުތަކުގައި ހެޔޮ ބަދަލުތަކެއް ގެނައުމަށްޓަކައި ޖަމިއްޔާތަކާއެކު މަސައްކަތްކުރުމަށް ބީއެމްއެލުން ކުރާ މަސައްކަތުގެ ވަރަށް ފުރިހަމަ މިސާލެއްކަަމަށެވެ. އަދި މި ފަސް ޕްރޮޖެކްޓުން މުޖުތަމައުއަށް ދެމެހެއްޓެނިވި ގޮތެއްގައި ފައިދާ ކުރާނެކަމަށާއި، ޕްރޮޖެކްޓްތަކަށް އެހީތެރިވެދެވޭކަމީ ލިބޭ ފަހުރެއްކަމަށް  ޢާއިޝަތު ނޫރައްދީން ވިދާޅުވިއެވެ.

މިއީ ކޮންމެ އަހަރަކު ފަސް މަޝްރޫއަކަށް 200،000 ރުފިޔާގެ ހިލޭ އެހީ ދިނުމަށް ބީއެމްއެލުން ހިންގާ ޕްރޮގްރާމެއްކަން ފާހަގަކޮށްލަން ޖެހެއެވެ.