މޭޖަލީގުސޮކާ (އެމްއެލްއެސް) އީސްޓަން ކޮންފަރެންސްގައި ރޭ ފަތިހު އިންޓަ މިއާމީ އާއި ކޮލަމްބަސް ކްރޫ ވާދަކުރި މެޗު ވާދަވެރި ކުޅުމަކަށްފަހު 3-2 ގެ ނަތީޖާއަކުން ކާމިޔާބުކޮށް އެމްއެލްއެސް ސަޕޯޓާސް ޝީލްޑް އިންޓަ މިއާމީން ފުރަތަމަ ފަހަރަށް ކާމިޔާބުކޮށްފިއެވެ.

ކޮލަމްބަސްގެ ދަނޑުގައި ކުޅުނު މިމެޗުގެ ފުރަތަމަ ހާފުގައި އިންޓަ މިއާމީ އިން ދެލަނޑުގެ ލީޑެއް ހޯދިއިރު، އެޓީމުގެ ދެލަނޑުވެސް ކާމިޔާބުކޮށްދިނީ ކެޕްޓަން ލިޔޮނަލް މެސީ އެވެ. އަދި މިއާއެކު މިސީޒަނުގައި ލީގުގައި ކުޅުނު 16 މެޗުގައި މެސީ ކާމިޔާބުކުރި ލަނޑުގެ އަދަދު ވަނީ 15 އަށް އަރާފައެވެ.

އެޓީމުގެ ތިންވަނަ ލަނޑު ދެވަނަ ހާފުގައި ކާމިޔާބުކޮށްދިނީ ތަޖުރިބާކާރު ފޯވާޑް ލުއިސް ސުއަރޭޒް އެވެ. އަދި ކޮލަމްބަސްގެ ލަނޑުތައް ކާމިޔާބުކޮށްދިނީ، ޑިއޭގޯ ރޮސީ އާއި ކޫޗޯ ހެނާންޑޭޒް އެވެ.

މި ނަތީޖާއެކު ލީގުގައި ކުޅުނު 32 މެޗުން އިންޓަ މިއާމީއަށް 68 ޕޮއިންޓް ލިބިފައިވާއިރު، އެޓީމު މިވަގުތު އޮލީ އެމްއެލްއެސް އީސްޓަން ކޮންފަރެންސް ލީގު ތާވަލުގެ އެއްވަނައިގައެވެ. އަދި މިމެޗުން ބަލިވި ކޮލަމްބަސް ކުޅުނު 31 މެޗުން ލިބުނު 57 ޕޮއިންޓާއެކު އެޓީމު އޮތީ ލީގު ތާވަލުގެ ދެވަނައިގައެވެ.

މީގެ އިތުރުން އެމްއެލްއެސް ލީގު ސީޒަނުގައި، އިންޓަ މިއާމިއަށް އަދި ބާކީ ދެ މެޗު އޮތްއިރު، އެ ދެ މެޗުން މޮޅުވެގެން، އެޓީމަށް ރެކޯޑެއް ހެދުމުގެ ފުރުސަތު އެބައޮތެވެ. އެ ގޮތުން، އެ ދެ މެޗުން މޮޅުވެއްޖެނަަމަ، އެމްއެލްއެސް ސީޒަނެއްގެ އެންމެ ގިނަ ޕޮއިންޓް ހޯދުމުގެ ރެކޯޑް އިންޓަ މިއާމީ އަށް ލިބޭނެ އެވެ. އެ ރެކޯޑް މިވަގުތު އޮތީ 2021 ވަނަ އަހަރުގެ އެއް ވަނަ ނިއު އިންގްލެންޑް ރިވޮލިއުޝަން އަތުގަ އެވެ.