ދެކުނުގެ އަތޮޅުތަކަށް މޫސުން ގޯސްވާނެކަމަށް ލަފާކޮށް، މޫސުމާއި ބެހޭ އިދާރާ (މެޓް އޮފީސް) އިން ރީނދޫ ސަމާލު ނެރެފިއެވެ.

މިގޮތުން މެޓް އޮފީހުން ވަނީ ގއ އަތޮޅުން ފެށިގެން އައްޑޫ ސިޓީއާއި ހިސާބަށް މިއަދު ހެނދުނު 8:30 އިން މެންދުރު 12:30 އާއި ހަމައަށް ރީނދޫ ސަމާލު ނެރެފައެވެ.

މެޓް އޮފީހުން ބުނީ، މި ސަރަހައްދަށް، ބޯކޮށް ވާރޭވެހި، ގުގުރާނެކަމަށާއި، ވިލާގަނޑުގައި ގަޑިއަކު 45 މޭލަށް ވައިގަދަވެ ކަނޑުތައް ގަދަވާނެކަމަށް ލަފާކުރާކަމަށެވެ.

Advertisement

މެޓް އޮފީހުން ވަނީ މި ސަރަހައްދަށް، ފަތިހު 5:30 އިން ހެނދުނު 8:30 އަށް ވެސް ރީނދޫ ސަމާލު ނެރެފައެވެ.

މިއަދު ހަވީރު 18:00 އާއި ހަމައަށް މުޅި ރާއްޖޭގެ މޫސުން ލަފާކުރާ ގޮތަށް ބަލާއިރު، އެ އިދާރާއިން ވަނީ އެކި ހިސާބަށް ވިއްސާރަކުރުމާއިއެކު ގުގުރައި، ދެކުނުގެ ބައެއްރަށްތަކަށް ބޯކޮށް ވާރޭވެހުން އެކަށީގެންވާކަމަށް ބުނެފައެވެ.

ހުޅަނގުދެކުނާއި ހުޅަނގުން ގަޑިއަކު 8 މޭލާއި 18 މޭލާއި ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވުން އެކަށީގެންވާކަމަށް ވެސް މެޓް އޮފީހުން ވަނީ ލަފާކޮށްފައެވެ.

މެޓް އޮފީހުން އިތުރަށް ބުނީ، އާދައިގެ ވަރަކަށް ކަނޑު ގަދަވެފައި، ވިލާގަނޑުގައި ގަދަވާނެ ކަމަށާއި، ރާޅުގެ އުސްމިނުގައި 3 ފޫޓާއި 6 ފޫޓާއި ދެމެދު ހުންނާނެ ކަމަށެވެ.

އެހެންކަމުން މެޓް އޮފީހުން ވަނީ، ހުރިހާ ފަރާތްތަކުން ވެސް މޫސުމަށް ސަމާލުވުމަށް އިލްތިމާސްކޮށްފައެވެ.