ދިވެހިންގެ ދިރިއުޅުމުގެ ހުރިހާ އަސާސްތައް ފެށިގެން އަންނަނީ އިސްލާމްދީނުންކަމަށް ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހީމް ވިދާޅުވެއްޖެއެވެ.

ވަޒީރު އާދަމް ނަސީރު މިފަދައިން ވިދާޅުވީ، މިއަދު ފާހަގަކުރަމުންދާ ރާއްޖެ އިސްލާމްވި ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ.

ވަޒީރު ވިދާޅުވީ، ތާރީޚުގައި އެންމެ ބޮޑު ހެޔޮ އިންގިލާބީ ބަދަލެއް އައި ދުވަހަކީ ރާއްޖެ އިސްލާމް ވި ދުވަސް ކަމަށާއި، އެދުވަހަކީ ދިވެހިންގެ ދިރިއުޅުމުގެ ހުރިހާ ކަމެއް އެންމެ ހެޔޮ މަގަށް އެނބުރުނު ދުވަސް ކަމަށްވާއިރު، ރާއްޖޭގެ އިލްމުވެރިކަން ލިޔެވެން ފެށީ ރާއްޖެ އިސްލާމްވުމަށް ފަހުގައި ކަމަށެވެ.

އާދަމް ނަސީރު ވިދާޅުވީ، އިސްލާމް ދީނަކީ ދިވެހީންގެ ދިރިއުޅުމުގައި އެންމެ އުހުގައި އޮތް، ދިވެހިންގެ ދިރިއުޅުމުގެ ހަގީގަތް ކަމަށާއި، ދިވެހިންގެ ވިސްނުމުގެ ހަގީގަތް ގުޅިފައި ވަނީ މާތްވެގެންވާ އިސްލާމްދީނާއި ކަމަށެވެ.

މީގެ އިތުރުންވެސް، މިސާލެއްގެ ގޮތުން ދިވެހީން މިސްކިތްތައް ބިނާކުރުމުގައި ގެދޮރާއި ތަފާތު ފަންނީ ކަންކަން ބޭނުންކޮށްފައި ހުންނައިރު، މިސްކިތެއް ރޫޅާލާ ހާލަތުގައި ވެސް އެތަނުގައި ބޭނުން ކޮށްފައި ހުރި ވަކަރު އެހެން ކަންކަމަށް ބޭނުންނުކުރާ ކަން ފާހަގަކުރައްމުން ވަޒީރު ވަނީ ދީނާ ގުޅުން ހުރި އެތައް ކަމެއް ދިވެހިންގެ ދިރިއުޅުމުން ފެންނަން ހުރި ކަމަށެވެ.

ކޮންމެ އަހަރެއްގެވެސް ރަބީޢުލްއާޚިރު މަހުގެ 2ވަނަ ދުވަސް ފާހަގަކުރަނީ ރާއްޖެ އިސްލާމް ވީ ދުވަހުގެ ގޮތުގައެވެ. މި ދުވަސް ފާހަގަކުރަނީ، އެއިރު ރަސްކަމުގައި ހުންނެވި ސިރީ ތްރިބުވަނަ އާދީއްތަ މަހާރަދުން އިސްލާމްދީން ޤަބޫލުފުޅު ކުރައްވައި، ދިވެހިރާއްޖޭގެ ރައްޔިތުން އެ ދީނަށް އެނބުރުމަށް 548ވަނަ އަހަރުގެ ރަބީޢުލްއާޚިރު މަހުގެ ކުރީކޮޅުގެ އަމުރުކުރެއްވުމުންނެވެ.

އެ ރަދުން  އިސްލާމްވެވަޑައިގަތުމަށް ފަހު އިޚްތިޔާރު ކުރެއްވި ނަންފުޅަކީ އައްސުލްޠާނު މުޙައްމަދު އިބްނު ޢަބްދުﷲއެވެ. ދިވެހީންގެ މެދުގައި  ރަދުންގެ ނަންފުޅު މަޝްހޫރު ވެފައި ވަނީ ދަރުމަވަންތަ ރަސްގެފާނުގެ ނަންފުޅުންނެވެ.