ދިވެހިރާއްޖެ އިސްލާމްވި ދުވަހުގެ މުނާސަބާ ފާހަގަ ކުރާއިރު، މި ދުވަހުގެ ނަމޫނާ ލިބިގަތުގައި ބަލަންވީ ރަސޫލާ (ސޢވ) ދުނިޔެއަށް ގެނެސްދެއްވި މޫރިތި އަޚުލާގީ ސިފަތަކުން ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރާއްޖެ އިސްލާމްވި ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީީ، ދޮގުވާހަކަތަކާއި ފުރައްސާރަ އާއި ދެބައުޑުވުމަކީ މަދީނާގެ މުނާފިގުން ފަށައިގަތް ކަމެއް ކަމަށެވެ.
މިގޮތުން ކީރިތި ޤުރުއާނުގައި ބަޔާންވެފައިވާ އިފްކުގެ ހާދިސާއަށް އަލިއަޅުވާލައްވައި، ރައީސް ޑރ.މުޢިއްޒު ވަނީ ކީރިތި ރަސޫލާ އަށާއި، މާތް ﷲ ރުއްސުންލެއްވި އާއިޝަތުގެފާނަށް އުފުއްލަވަން ޖެހިވަޑައިގެން ތަކުލީފުތަކަކީ ސިޔަރަތުން އަޑުއަހާފައިވާ ވާހަކަތަކެއްކަން ރައީސް ޑރ.މުޢިއްޒު ފާހަގަކުރެއްވިއެވެ.
"ދިވެހިރާއްޖެ އިސްލާމްވުން ފާހަގަކުރެވޭ ދުވަހު، އަޅުގަނޑުމެން ނަމޫނާ ލިބިގަންނަންވީ މުނާފިގުން ދުނިޔެއަށް ތައާރަފްކުރި ދަށުދަރަޖައިގެ ހުތުރު ފިތުނަތަކަކުން ނޫން. އަޅުގަނޑުމެން ނަމޫނާ ލިބިގަންނަންވީ ރަސޫލާ (ސޢވ) ދުނިޔެއަށް ގެނެސްދެއްވި މޫރިތި ރިވެތި އަޚުލާގީ ސިފަފުޅުތަކުން."
ރައީސް ޑރ.މުޢިއްޒު ވިދާޅުވިއެވެ.
ރައީސް ޑރ.މުޢިއްޒު ވިދާޅުވީ، އަނެކުންގެ ހިތަށް ފިނިކަމާއި ހަމަޖެހުން ގެނެސްދޭ މިތުރަކަށް ވާން ޖެހޭ ކަމަށާއި، މުސްލިމުންނަކީ ލޮލުން ބަލާ ބެލުމާއި ކަންފަތުން އަހާ އެހުމާއި، ދުލުން ބުނާ ބުނުމުގައި މަސްއޫލުވެރި ބައެއް ކަމަށެވެ.
ދޮގާއި ފުރައްސާރަ ފެތުރުމުގެ ބާޒާރަކީ އިސްލާމީ ސަގާފަތުން ޖާގަ ލިބޭނެ ބާޒާރެއް ނޫންކަން ފާހަގަކުރައްވަމުން ރައީސް ޑރ.މުޢިއްޒު ވިދާޅުވީ، ދޮގާއި ޣީބައާއި ފުރައްސާރަ އުފުލާ ފާސިގުން ގެންނަ ވާހަކަތައް ގަބޫލުކުރުމުގެ ކުރިން އޭގެ ދޮގު ތެދުބެލުމަށް ކީރިތި ގުރުއާން އިރުޝާދުދޭ ކަމަށެވެ.
ކޮންމެ އަހަރެއްގެވެސް ރަބީޢުލްއާޚިރު މަހުގެ 2 ވަނަ ދުވަސް ފާހަގަކުރަނީ ރާއްޖެ އިސްލާމް ވީ ދުވަހުގެ ގޮތުގައެވެ.
Advertisement
This content is created and paid for by advertisers and does not involve Voice Journalists
